Ukioq kaajallallugu digitalimik Siumoortumik nalunaarsuisinnaalerneq innut-taasunut inuussutissarsiummillu ingerlataqartunut pisariinnerulersitsisoq. Aaqqiis-sut maannangaaq aallartinneqartoq

”Innuttaasunut ataasiakkaanut inuussutissarsiummillu ingerlataqartunut isertitariumaagassatut aningaasartuutigiumaagassatullu naatsorsuutigisanik ukioq kaajallallugu nalunaarsuisinnaanermik ataavartumik pisariillisaanerput ingerlapparput. Taamaattumik nuannaarutigalugu nalunaarutigissavarput aaqqiissut digitalimik siumoortumik nalunaarsuinissamut periarfissaq nutaaq neqeroorutigileratsigu, taamalillutik innuttaasut ataasiakkaat inuussutissarsiummillu ingerlataqartut ukiup ingerlanerani eqqortumik akileraarsinnaanissaanut qulakkeerinnittoqarsinnaalerluni.” Akileraartarnermut Aqutsisoqarfimmi Aqutsisoqarfiup pisortaa Kim Neumann Nielsen taamak oqarpoq.

Taamaalilluni inuussutissarsiummik ingerlataqartunut innuttaasunullu ataasiakkaanut atugassarititaasut pisariinnerulerput. Akileraartarnermut Aqutsisoqarfiup digitaalimik aaqqiissut illit uangalu inuunitsinnut pisariinnerulersitsisussaq matumuuna saqqummiuppaa. Aaqqiissut maannangaaq atuutsinneqarlerpoq. Aaqqiissut akileraartartunut inuussutissarsiummillu ingerlataqartunut ukununnga immikkut sunniuteqassaaq.

- Ilinniakkamik ingerlataqartunut. Ilinniartorpassuit ilinniagaqarnermusiat (Aningaasarsiat B-t) saniatigut sulinermikkut aningaasarsianik A-nik isertitaqartarput. Ilinniakkamik ingerlataqartut Aningaasarsiatik B-t eqqortumik nalunaarsortarunikkit akileraarutissanut tapissanik akiliinissartik pinngitsoortissavaat.

- Namminersorlutik inuussutissarsiummik ingerlataqartut nikerartumik isertitallit ukiulluunniit tullianut ilanngaatissamik amerlassusissaannik suli qulakkerinninngitsut. Inuussutissarsiummik ingerlataqartut ukiup ingerlanerani suliffeqarfimminnut aningaasaliisimagunik ilanngaammik pissarsissutigisinnaavaat. Uanilu pitsaaqutaavoq Siumoortumik nalunaarutip allanngortinneratigut ilanngaatissap atuutsiaarnerulersissinnaanera.

- Innuttaasunut assersuutigalugu qamutinik motoorilinnik, umiatsiamik imaluunniit inimik/illumik pisinermi aningaasanik taarsigassarsisimasunut, taarsigassanik aaqqissuusseqqissimasunut imaluunniit taarsigassarsiaminnik naammassinnissimasunut siumoortumik nalunaarsuinerup allanngortinneratigut eqqortumik akileraartarnissaq qulakkeerneqarsinnaavoq.

Siumoortumik nalunaarsuiffissanik immersorsimasanik allanngortissimasanilluunniit Akileraartarnermut Aqutsisoqarfimmut tunniussisinnaaneq suli periarfissaajumaarpoq. utaqqisarfimmili utaqqeratarsinnaanerit naatsorsuutigissavat, Akileraartarnermut Aqutsisoqarfiup innuttaasunut sullissiviata januari qaammat ulaapaarfiginerpaasarmagu. Taamaattumik kajumissaarutigissavarput digitalimik aaqqiissuterput misilittaqqullugu.

Paasissutissat

• Digitalimik siumoortumik naalunaarsuineq ’Akileraarutikka’ Sullissivik.gl-imi iserfigalugu immersorneqassaaq.
• Siumoortumik nalunaarsuineq pillugu paasisaqarnerusinnaavutit www.aka.gl iserfigalugu
• Ukiup tullissaanut siumoortumik nalunaarsuinissamut, nalunaarsukkallu tunuliaqutaralugit akileraartarnermut allagartassap inissinnissaanut novemberip 15-iat killigitaavoq. Akileraartarnermut allagartassat decemberip 15-iani nassiussuunneqarumaarput. Novemberip 15-iata kingorna digitalimik siumoortumik nalunaarsuisimaguit decemberip ingerlanerani akileraartarnermut allagartassannik nutaamik nassinneqarumaarputit.
• Aaqqissutissaq nutaaq akileraartarnermut allagartamik e-Boksikkut nassiussisinnaanermik malitseqartussaq ingerlanneqaleruttorpoq. Tamannalu isumaqarpoq akileraartarnermut allagartamik piniarnermi innuttaasunut sullissivitsinnut orniguteqqaartariaarutissagavit.


Innuttaasut qulaani allassimasut pillugit apeqqutissaqarunik
Attavissaavoq: Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, tlf. + 299 34 65 00, mail: tax@nanoq.gl

Tusagassiortut qulaani allassimasut pillugit apeqqutissaqarunik
Attavissaavoq Thomas Holm Jensen, Akileraartarnermut Aqutsisoqarfik, oqar. + 299 34 65 29, mail: thoj@nanoq.gl.