AtuartigukPuigortunngortut nittartagaat nutaaq kalaallisut taaguuserneqartoq
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik
www.usi.gl tassaassaaq Kalaallit Nunaanni puigortunngorneq pillugu nittartakkap 2025-mi ukiortaami atuutilertussap taaguutissaa nutaaq.
Unammisitsinermi ajugaasoq Iphonemik eqquivoq.
Naalakkersuisut maannakkut puigortunngortunut nittartakkap taaguutaa nutaaq saqqummiussinnaalerpaat: www.usi.gl
Taaguutaa nuna tamakkerlugu unammisitsinermi nassaarineqarpoq, peqataasut 24-t pitsaasunik nutaaliaasunillu siunnersuuteqarmata. Naalakkersuisut soqutiginninnermut annertuumut taaguutissatullu isummersorfiusunut nassiunneqartunut qujassuteqarput.
Unammisitsinermi ajugaasoq tassaavoq Káte Hansen, attavigineqareertoq eqqukkanilu tigoreerlugu – iPhone nutaanerpaaq. Taaguutaa ”usi” taajuminartuunera, eqqaamajuminartuunera isumaqarneralu pillugit aalajangiisartunit toqqarneqarpoq – pingaartumik sammisamut eqqaamasinnaanermut attuumatillugu, puigortunngornermut qitiulluinnartoq.
"Taaguut usi.gl toqqagaavoq paasiuminartuummat nukittullunilu, nittartakkap siunertaanut ersersitsisoq: puigortunngortunik qanigisaanillu paasissutissanik ilitsersuinermillu tapersersuinissaq. Qilanaarivara, nittartagaq ulloq 1. januar 2025-mi atuutilersinneqarnissaa, taamaalilluni innuttaasunut iluaqutaasinnaalerluni”, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.
Puigortunngortunut nittartagaq tassaassaaq Kalaallit Nunaanni puigortunngorneq pillugu ilisimasanik katersuiffik siullerpaaq aamma atortussanik allagaatinik videonillu imaqartussaq, nuna tamakkerlugu tamanut puigortunngorneq pillugu ilisimasanik pissarsiffigineqarsinnaasoq.
Annertunerusumik paasisaqarniaruit attaveqarfigikkit naalakkersuisup allattaa Helene S. Pedersen e-mailikkut: hspd@nanoq.gl imaluunniit oqarasuaatikkut + 299 34 56 11