Aalisarneq pillugu Savalimmiunik 2025-mut isumaqatigiissuteqarneq

Kalaallit Nunaat Savalimmiullu illugiillutik aalisarneq pillugu 2025-mut isumaqatigiissuteqarput. Isumaqatigiissut tunngavigalugu kalaallit aalisartui Savalimmiut imartaanni 2025-mi aalisarsinnaassapput aamma Savalimmiormiut Kalaallit Nunataata imartaani 2025-mi aalisarnissaannut tunngaviussaaq.

Kalaallit Nunaat Savalimmiut imartaanni saarullernanik 2025-mi amerlanerusunik pisassaqassapput, 3.250 tonsinik 2024-mit amerlanerusunik aalisarsinnaallutik. Akerlianik ammassassuarnik 600 tonsinik ikinnerusunik pisaqassapput. Tamanna pissuteqarpoq Savalimmiut imartaanni tamakkiisumik ammassassuartassat aamma ikilisinneqarmata.

Taamaalilluni kalaallit aalisartui Savalimmiut imartaanni saarullernat 2025-mi 23.750 tonsit pisassaraat aamma ammassassuit 4.900 tonsit aalisarsinnaassallugit. Aamma kalaallit aalisartuisa saarullernat nunat tamalaat Savalimmiut imartaanniittut pisassatik aalisarsinnaassavaat. Savalimmiormiut Kalaallit Nunaata imartaani 2025-mi pisassaat allannguuteqassanngillat, 2024-mi pisassat assigalugit.

Aalisakkat pillugit 2025-mut isumaqatiginninniarnerit atorfilittanit Tórshavinimi novembarip 21-anni aamma 22-anni 2024-mi ingerlanneqarput. Kalaallit isumaqatiginninniartui Aalisarnermut Piniarnermullu Naalakkersuisoqarfimmi atorfilittanit siulersorneqarput, isumaqatiginninniaqataallutik Kalaallit Nunaanni Aalisarnermut Piniarnermullu Nakkutilliisoqarfik, Aningaasaqarnermut Akileraartarnermullu Naalakkersuisoqarfik, Pinngortitaleriffik aamma aalisarnermik inuussutissarsiuteqartut.
Isumaqatigiissummi allanneqartut nutaat kalaallisut nutserneqariarpata apn.gl-ikkut saqqummiunneqassapput 

Tabelimi pisassatut 2025-mi paarlaasseqatigiinnertut aalisagartassat tonsinngorlugit allanneqarput, ukiut siulii aamma ilanngunneqarlutik.

Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl