Takornariartitsinermi piujuartitsinerup najukkamilu inissisimatitsinissap tungaannut alloriarneq annertooq

Nunatsinni takornariartitsisarneq pillugu inatsit siulleq maannakkut Inatsisartuni akuerineqarpoq aammalu takornariartitsinermut suliassaqarfiup ineriartortinnissaanut anguniakkani killiffimmik malunnartitsilluni. Inatsimmi takornariartitsisarnerup piujuartussatut ineriartortinnissaa najukkanilu inissisimatinnissaa qulakkeerneqassaaq, peqatigisaanillu pitsaassuseqalersitsilluni, isumannaatsuutitsilluni akisussaassuseqartitsillunilu. Inatsisip ulloq 1. januar 2025 atuutilernerani Kalaallit Nunaat takornariartitsinermik suliaqarnermut maleruagassaqartinneqarnerusumut sinaakkutissaqalerpoq, pinngortitaq, kulturi najukkanilu innuttaasut ataqqillugit siuariartortitsisoqassalluni.

2/3-inik najukkani piginnittuunissaq

Inatsimmi qitiusuni ilaatinneqartut ilagaat, akuersissummik pissarsinissamut takornariartitsinermut suliffeqarfiit minnerpaamik 2/3-inik najukkaneersunik piginnittoqartussaanerat pillugu piumasaqaat. Taamatut suliniuteqarnermi takornariartitsinermi aningaasaqarnikkut pissarsiassat Kalaallit Nunaanniitinneqarnerulernissaannik qulakkeerinissaq aammalu najukkani siuariartortitsinissamut suliffissaqartitsinissamullu tunngavissiinissaq. Peqatigisaanik zone-nut agguluinissamut periarfissaq, pinngortitaq, kulturi imaluunniit inuussutissarsiutit allat mianeralugit sumiiffinnukarsinnaanermut maleruagassiiviusoq, ammaanneqarpoq. Inuussutissarsiutinik ineriartortitsinerup avatangiisinillu allanngutsaaliuinissap akornanni oqimaaqatigiissitsinissaq Naalakkersuisut eqqumaffigaat, aammalu akisussaassusilimmik takornariartitsinermut suleriaaseqarnissaq inatsimmi tunngavissinneqassaaq.

"Takornariartitsinermut suliassaqarfimmi ineriartortitsinissamut najukkani inissisimatitsinissaq pingaaruteqartorujussuuvoq. Najukkami inissisimatitsineq, takornariartitsinermik inuussutissarsiuteqartunut tapersersuinerup ingerlaannarnissaanik qulakkeereqataassaaq, tamannalu aalajangiisuulluinnartumik pingaaruteqarpoq. Takornariat tikilluaqqorusuppagut aammalu pinngortitaq kulturerpullu taakkununnga misigitikkusuppagut – aammalu taakkua nunatsinniinnerisa inuiaqatigiinnut iluaqutaanissaat kissaatigaarput. Naalakkersuisut takornariartitsinermi periarfissaqarfiit annertoorujussuusut takusinnaavaat aammalu inuussutissarsiortut amerliartulernissaat qularutiginagu" oqarpoq Naalakkersuisoq, Naaja H. Nathanielsen.

Takornariartitsinermi isumannaallisaanerup pitsaassutsillu nukittorsarneqarnerat

Inatsisip nutaap atuutilernerani takornariartitsinermut suliffeqarfiit tamarmik Naalakkersuisunit akuerineqartartussaapput aammalu aarlerinaataasut ajornartoornerillu qanoq iliuuseqarfiginiarneraat nassuiaaviusunik, isumannaallisaanermut pilersaarusiortussaapput. Takornariat toqqissisimanartumik pikkorissusilimmillu misigisaqartinneqarnissaannut tamanna qulakkeerissaaq, peqatigisaanillu najukkani innuttaasut illersorneqassallutik. Naalakkersuisut aamma maleruagassat malinneqarnerannik nakkutiginninnissamut periarfissaqalissapput, aammalu suliffeqarfiit piumasaqaatinik naammassinninngitsut akiligassissinnaallugit imaluunniit akuersissutaat atorunnaarsissinnaallugu. Suliniutissani Kalaallit Nunaat takornarianit ornigassatut isumannaannerulersinneqassaaq orniginarnerulersinneqassallunilu aammalu takornariartitsinermik inuussutissarsiutillit sakkortunerusumik annertunerusumillu akisussaassuseqartilissallugit.

Takornariartitsinermut inatsimmi nutaami Kalaallit Nunaanni takornariaqarnermut piffiit nutaat aallartinnerat malunnartinneqarpoq. Takornariartitsisarnermi periarfissaqarfiit piujuartitsinissaq inuiaqatigiinnullu tamakkiisunut naleqartitsinissaq qulakkeerlugu, najukkani nunanilu tamalaani suliaqartuusut suleqatiginissaat Naalakkersuisut qilanaaraat.

Paasissutissanik annertunerusunik piniarnermi attaveqarfigineqassaaq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, Email: asn@nanoq.gl Oqarasuaat: +299 34 50 00