Pilersitsivinni sulisut PBL-imut pikkorissarnerat

Pilersitsivinni ilinniartitsisut aqutsisullu Nuummi 16.-18. november 2024, PBL-imik pikkorissarnereerlutik allagartartaartut. PBL (Projekt Baseret Læring), tassaavoq Projekteqartitsinermik tunngaveqartumik pædagogikkeqarluni atuartitsineq.

PBL-imik pikkorissaaneq modulinut marlunnut avinneqarsimavoq. Modul 1. 23-25. september, 2024 Modul 2.-lu 16-18.november, 2024 ingerlanneqarluni. Peqataasut katillugit inuit 13-it PBL-imut pikkorissarsimanertik pillugu PBL-pilotitut imminnut taasinnaanngorput.

PBL-imik pikkorissaatitsineq Majoriaqarfiit ataanni sullivinni Pilersitsivinni atuartitseriutsip inerisarneqarnerannut attuumassuteqarpoq. Sullivinni Pilersitsivinni atuartitsinermi, periutsit sinaakkuseeriaatsillu ineriartortinnerisigut, inuusuttut sulilersinnaanissaat ilinniakkamilluunniit aallartissinnaalernissaannut aqqut piuminarneruleqqullugu.

PBL-imik pikkorissaanernut atatillugu pikkorissartut Nuummiinneranni septemberimi Inuussutissarsiutigalugu ilinniarfeqarfiit, piviusuusaartitanik ilinniartitsivittallit ilanngullugit paasisassarsiorfigineqarput. Modul 2-mullu atatillugu sinerissami Pilersitsiveqarfinni ilinniartitsisut aqutsisullu ataatsimoortillugit suliamut tunngasunik avitseqatigiissinnneqarlutik.

Pikkorissarneq pillugu naliliinermi peqataasut tamarmik iluarisimaarpaat, taamatut siullerpaamik Majoriaqarfiit ataanni sullivinni Pilersitsivinni atuartitsisartut pædagogikkimut tunngasunik pikkorissarneqarlutillu sinerissamiittunillu fageqatigisaminnik naapitaqarnertik. Naapisinneqarnerup ilaattut eqqartorneqartoq illoqarfeqatigiinngikkaluarluni qanoq isiorluni sullivinni atuartitsinermi suleqatigiittoqarsinnaanera, pilersaarutinillu avitseqatigiittoqarsinnaanera aamma peqataasunit iluarineqarpoq, siunissamilu kommunit akimorlugit suleqatigiiffiusinnaasunik pilersitsinera eqqaaneqarluni.

Siunissamut sammisumik pilersaarut
Naalakkersuisut kommuninik suleqateqarnerup sinaakkutissaanik suliaqarput, Pilersitsiviit ingerlanneqarnissaat pillugit isumaqatigiissuteqartoqartussaammat. Pilersaarutaavoq 1.januar, 2025 Pilersitsiviit pisortatigoortumik ammarneqarnissaat.

Isumaginninnermut, Ilaqutariinnermut, Suliffeqarnermut Nunamullu Namminermut Naalakkersuisoq Jess Svane imak oqarpoq: ”Inuusuttut suliffeqalernissaat ilinniagaqalernissaallu periarfissaqarnerulersinniarlugit iliuuseqarnissaq Naalakkersuisunit annertuumik eqqumaffigineqarpoq. Taamaattumik nuannaarutigingaarparput nioqqutissiornermut assingusumik atuarfiit Pilersitsiviit kommunini tallimaasuni tamani aallartinnissaannik kommunit suleqatigalugit anguniakkap naammassinissaa qanilliartormat. Kommuninik suleqateqarneq pingaartuuvoq, Naalakkersuisullu tamanna naleqartittorujussuuaat. Inuusuttunut neqeroorut nutaaq ukioq ataaseq ingerlasimalereeriarpat naliliiffigineqarumaarpoq, tamatumani paasiniarneqassalluni inuusuttunut neqeroorut tamanna, piviusumi kommunit inuusuttunik suliffeqalersitsiniarnermut ilinniagaqalernissamullu suliuniutaannut naapertuunnersoq.

Uani PBL-imik pikkorissarneq pillugu filmeeraliaq takuneqarsinnaavoq: PBL i Grønland - YouTube


Attavissaq
Naalakkersuisumut allatsi Helene S. Pedersen på e-mail: hspd@nanoq.gl imlt tlf. + 299 34 56 11