AtuartigukPNNP tunngavigalugu aalisarnissamut pisassiissutinit pisassat naatsorsorneqarput
Nassiussisuuvoq: Aalisarnermut Piniarnermullu Naalakkersuisoqarfik
Aalisarneq pillugu inatsisip nutaap aqutsiveqarfik 47-mi umiatsiaararsortut namminneq toqqakkamittut PNNP tunngavigalugu aalisalersinnaanissaannut periarfissippai. Aalisarnermut Piniarnermullu Naalakkersuisoqarfik PNNP-mik aaqqissuussinerup timitalernissaa pillugu maannakkut suliaqaleruttorpoq, taanna tunngavigalugu aalisalernissap aallartinnginnerani allaffissornertaa naammassiniassallugu.
Aalisartut PNNP tunngavigalugu 2025-imi aalisalernissamut oktobarip 15-iat 2024 nallertinnagu qinnuteqarsinnaatitaanikuupput.
Pisassiissutinit pissarsisussat ukiuni tallimani kingullerni pisarisimasanit ukiut pingasut pisaqarluarfiunerpaat aallaavigineqassapput, ukioq mannalu qinnuteqartunut ukiut 2019-2023 aallaavigineqassallutik. Piffissaq pineqartoq naleqqussaaffigineqassaaq, apeqqutaallunili aalisartup aaqqissuussinermut nutaamut aalisalerniarluni ukioq qinnuteqarfigisaa.
Aalisarnermut Piniarnermullu Naalakkersuisoqarfiup PNNP tunngavigalugu aalisalerusullutik qinnuteqarsimasut tamaasa allaffigisimavai. Naalakkersuisoqarfiup allakkiaani taakkartorneqarpoq qinnuteqartup massaakkumuugallartoq naatsorsorallarsimasaat naapertorlugit 2025-mi pisassiissutinit pigiligassatut annertussususissaa. Pisassiissutinit pigisassatut tunniussassat ataasiakkaanut tunniunneqarnissaat ukiunut tulliuttunut tunngaviliissaaq.
Qinnuteqartut pisassiissutinit pisassat naatsorsorneqarallarneri pillugit novembarip 25-at 2024 nallertinnagu maalaarutigisinnaavaat.
Maalaarutigineqartut suliarineqassapput, naatsorsueqqissaareernerullu kingorna pisassiissutigineqartussat aalisartunut (qinnuteqartunut) decembarip aallartissimalernerani ilisimatitsissutigineqassapput.
PNNP tunngavigalugu aalisalernissamut qinnuteqaat 2024-mi decembarip 12-iata tungaanut tunuartinneqarnissaanut periarfissaqarpoq.
2025-mut tamakkiisumik pisassiissutit aatsaat naatsorsorneqarsinnaalissapput 2025-mut pisassat tamarmiusut (TAC) aalajangiiffigineqareerpata.
Sukumiinerusumik paasisaqarusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl