’Illuliornermut sanaartornermullu inuussutissarsiornermi piujuartitsinissamut nunami namminermi periusissiaq’ Naalakkersuisut akueraat

Nuannaarutigisorujussuullugu Ineqarnermut Attaveqaasersuutinullu Naalakkersuisup Hans Peter Poulsen-ip nalunaarutigisinnaava Naalakkersuisut ’Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ maannakkut akuerisimammassuk.

Naalakkersuisoq Hans Peter Poulsen oqarpoq:
”Nunatsinni illuliornermut sanaartornermullu inuussutissarsiornerup piujuartitsiviunerusumik ineriartortitseqataanissaq, ’Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ akuerinerani Naalakkersuisut kissaatigaat. Periusissiami siunertaavoq ataatsimoorluni ungasissumut siunnerfissanik aalajangersaanissaq aammalu siunissami suliaqarnernut sinaakkutissiinissaq. Periusissiamut aallaavigineqarpoq, ineriartortitsinerup inuiaqatigiit tamakkerlugit iluaqutaanissaanut tapersiiviusumik, piujuartitsinissap atituumik tamakkiisumik isiginnilluni ukkatarineqarnissaa.

Ataasiakkaatigut iliuuseqarnissaq pisariaqartoq Naalakkersuisut isumaqarput, kisianni isumaqarlutik illuliani pioreersuni naleqqussaasinnaaneq allanngorsaasinnaanerillu piffissap ingerlanerani annertusiartortumik ingerlanneqartariaqaraluartut aammalu najukkani pisinnaasat periarfissallu eqqarsaatigineqartariaqartut.

Inuussutissarsiummi aammalu illulioriaasitsinni piviusumik piujuartitsiviusumillu allanngoriartortitsinissamut inuussutissarsiutit akimorlugit sakkortuumik suleqatigiinnissaq pisariaqarpoq. Neriuutigaara periusissiami matumani tamatumunnga taperseeqataasinnaalluta.”

Periusissiami siunissami suliaqarnissamut takorluukkat pingaarnerit kiisalu periusissatigut siunnerfissat arlallit aalajangersarneqarput. Tassunga ilanngullugu inuussutissarsiornermut takorluukkat pingaarnerit angunissaasa tungaanut alloriarnertut siullertut, ataasiakkaatigut suliniutissat arlallit aallartinneqarnissaat siunnersuutigineqarpoq. Namminersorlutik Oqartussat nunatsinni sanatitsisut annersaraat, taamaattumillu toqqaasarnermigut piumasaqaateqartarnermigullu inuussutissarsiornerup sinnerani ineriartornermut sunniinissamut periarfissaqarlutik. Taamaattumik suliniutissat siunnersuutigineqartut ilaanni Naalakkersuisut nammineerlutik illuliassaat aallaavigineqarput.

Aallaqqaataaniit inatsimmik nutaamik atuutsitsilernissaq imaluunniit inuussutissarsiornermi suliaqarnissaq ajornakusoornerulersillugu nutaanik piumasaqaateqarnissaq, periusissiami siunertaanngilaq. Siunertaavoq inuussutissarsiutip suup tungaanut ingerlanissaa aammalu piujuartitsinerusumik ineriartortitsinissaq qanoq tunngavissinneqarsinnaanersoq pillugit inuussutissarsiortunik oqaloqateqarnerup aallartinnissaa peqataaffiginissaalu. Periusissiami anguniagarineqarpoq ataatsimoorluni tunngavissaqalernissaq, inuussutissarsiortut ataatsimoorlutik ineriartorteqqissinnaasaannik.
’Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ piffissami ulloq 13. juni aallarnerfigalugu ullup 27. august tungaanut tamanut ammasumik tusarniaassutigalugu nassiunneqarsimavoq. Periusissiaq tusarniaanermut akissutinut tiguneqartunut naleqqussarneqarpoq.

’ Illuliortiternermik sanaartornermillu inuussutissarsiutilinni piujuartitsinissamut nunami namminermi periusissiaq’ uani aaneqarsinnaavoq

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl