Naalakkersuisut kommunillu 2025-mut ataatsimoortumik tapiissutinut isumaqatigiissut nutaaq assammissutigivaat

Borgmesterit Aningaasaqarnermullu Akileraartarnermullu Naalakkersuisoq ullumi 2025-mut kommuninut ataatsimoortumik tapiissutit pillugit isumaqatigiissuteqarput.

Isumaqatigiissutip nutaap immikkoortui
2025-mut kommuninut ataatsimoortumik tapiissutit 2,025 milliard kr.-nik naleqarput. Ataatsimoortumik tapiissutit akinut akissarsianullu 2,25 procentinik iluarsiffigineqarput.

Siullerpaamik ataatsimoortumik tapiissutit 2025-mit ukiumut 158,65 mio. kr.-nik qaffanneqarput. Tamanna akileraartarnermik aaqqissuusseqqinnermut “Nunarput najoruminarnerulersitsigu” atatillugu pivoq.

Isumaqatigiissummik ilanngullugu ataatsimoortumik tapiissutit 30,586 mio. kr.-nik qaffanneqarput, kommunit siusinaartumik suliunnaarnersiutinik suliassaqarfimmut aningaasartuutaanut tapiissutitut. Taakkunannga 30 mio. kr.-t ataasiartumik aningaasaliinerupput. Qaffaanermut tunngaviuvoq siusinaartumik suliunnaarnersiutit pillugit inatsimmik naliliineq, takutimmagu siusinaarluni suliunnaarnersiutisiaqalernissamut misissuisarnerup pitsanngorsarnissaa kiisalu siusinaarluni suliunnaarneriutit aamma aaqqiissutit allat akornanni pitsaanerusumik ataqatigiissitsinissaq pisariaqartoq. Illuatungeriit tamanna 2025-mi malittareqqissavaat.

Tamatuma saniatigut ataatsimoortumik tapiissutit 2025-nnarmi 25 mio. kr.-nik qaffanneqassapput, kommunit suliffissarsiornermi ikiorsiisarnernut aamma pisortat ikiorsiissutaat pillugit inatsisinik nutaanik atulersitsiniarneranni unammilligassat aallartittut pakkersimaarnissaannut Naalakkersuisut aaqqeeqataanissamut suleqataarusunnerat.

Ilanngullugu ataatsimoortumik tapiissutit 5,5 mio. kr.-nik qaffanneqarput 1. januar 2025-mit angajoqqaarsiaasartut paarsinermi akissarsiat isertitanit B-nit isertitanut A-nut allanngortinnissaat pillugu, peqatigitillugulu nalinginnaasumik ilanngaatit atuuttut peerneqarnissaat kiisalu ilanngaatit akileraarutitigut nalinganik akissarsiat qaffanneqarnissaat pillugu aalajangiinerup kingunerisaanik. Tamanna aalajangiineruvoq, angajoqqaarsiat pitsaanerusumik atugarisaqarnissaannik nassataqartussaq.

Isumaqatigiissutip tamatuma imarai immikkoortut annikinnerusut teknikkimut tunnganerusut.

Aningaasaqarnermut Akileraartarnermullu Naalakkersuisup Erik Jensenip isumaqatigiissut nuannaarutigaa, imatullu oqaaseqarluni:

“Iluarisimaarpara, ataatsimoorluta angusarisatsinnut, isumaqatigiissutigalutigulu alloriaratta, taamaasilluta Namminersorlutik Oqartussanut aamma kommuninut pisussaaffiliiffiusumik isumaqatigiissuteqaratta. Isumaqatiginninniarnermi illuatungeriit tamarmik aalajangiusimassapput pissarseqatigiillutik, isumaqatiginninniarnernilu taakkunani illuatungeriit imminnut naapigiaaffiusumik, aningaasat aqulluarniarlugit.

Kialuunniit isumaqatiginninniarnermi kissaatini tamaasa pisinnaanngikkai ilisimavarput. Naalakkersuisutullu nammineq immikkut nuannaarutigaara, meeqqanut angajoqqaarsiaasartut, nunatsinni tamarmi pisariaqartilluinnakkatta kiisalu suliarujussuannut qujassutissaqarfigilluinnakkatta atugarisaannut pitsanngorsarniarlugit inissiigatta. Ilanngullugu isertuutissanngilara, isumaqatiginninniarnerit sivisusimammata, minnerunngitsumillu Namminersorlutik Oqartussani atorfilittanut aammalu kommunini atorfilittanut, misissuinernut pingaarutilinnut piareersarnerit annertuut sivisuumik suliarilluarsimammatikkit. Aamma taakku suliaqarnermut qujaffigineqartariaqarput.

Minnerunngitsumillu aamma nunatsinni borgmesterit tamaasa isumaqatiginninniaqataanerannut atsioqataanerannullu qujarusuppullunga.”