AtuartigukPeqqissutsimut Naalakkersuisoq Ittoqqortoormiinut tikeraarpoq
Nassiussisuuvoq: Peqqissutsimut NaalakkersuisoqarfikPeqqinnissamut Naalakkersuisoq, Agathe Fontain, Ittoqqortoormiinut novemberip aallaqqaataani 2024 tikeraarpoq. Tikeraarneq innuttaasunik peqqinnissaqarfimmilu sulisunik, peqqinnissamut sumiiffimmilu unammilligassat pillugit suleqatigiinnerulernissamik siunertaqarpoq. Tikeraarnermi innuttaasut najukkamilu siunnersoqatigiit ataatsimeeqatigineqarput. Peqqissaavimmiut, meeqqat atuarfiat utoqqaallu angerlarsimaffiat pulaarneqarput.
Peqqinnissaqarfimmi sulisut taarserakulanerat aalajangersimasumillu nakorsaqannginnera ernumassutigineqartut innuttaasut ataatsimiinneranni 14-it peqataaffigisaanni oqaatigineqarput. Tamatuma saniatigut Islandermiut peqqinnissaqarfiat katsorsaasarnermut tunngatillugu suleqatigineqarnerulernissaat, taamatullu napparsimasunik ajornannginnerusumik Nuummut angallassisoqarsinnaanissaa eqqarsaatigalugu Kulusummut toqqaannartumik aqquteqalernissaa kissaatigineqarput.
Ittoqqortoormiini ukiuni tallimani kingullerni aalajangersimasumik nakorsaqanngikkaluartoq, peqqissaasut peqqissaanermut sulisut qarasaasiakkullu nakorsiartitsisarnikkut aaqqissuutit peqqutaallutik ingerlalluartoqartoq, pulaarnermi peqqinnissaqarfimmi sulisunniit oqaatigineqarpoq.
Atuarfimmi atuartunut akullernut angajullernullu tupanut imigassamut aalakoornartutalinnullu pinaveersaartitsinermik tunngasunik, taamatullu peqqilluni inersimasunngussagaanni timi ullut tamaasa aalatinnissaa qanoq pingaaruteqartiginersoq qiterititaralugit Peqqinnissamut Naalakkersuisoq saqqummiussivoq.
Ittoqqortoormiini illoqarfiup ineriartornera sammisassallu pillugit najukkami siunnersoqatigiinnit suliarineqartut saqqummiunneqarput. Najukkami aaqqissuussinernut sunngiffimmi suliaqartartut siunnersueqatigiinnit suleqatigineqartarput. Atortulersuutinut tunngatillugu, soorlu imermik pilersuinermut, perusuersartarfiit nutaanut taamatullu innarluutilinnut utoqqarnullu inissiat pitsaanerusunut tunngatillugu pisariaqartitsisoqartoq aamma oqaatigineqarput.
Naalakkersuisoq Agathe Fontain oqarpoq:
"Innuttaasunit, atuarfimmit sumiiffimmilu siunnersuisoqatigiinnit sumiiffimmi unammillernartunut tunngatillugu toqqaanartumik paasisaqarluni pissarsiaqarnarpoq. Ittoqqortoormiini ulluinnarni pissutsinut tunngasunut paasisaqarluni pingaaruteqarpoq, isorliunerusunullu peqqinnissamut inuuniarnikkullu atugassarititaasunut tunngasunik nukittorsaanissamut suliaqarnermut ilanngunneqassapput."
Sukumiinerusumik paasisaqarusukkuit naalakkersuisup allattaa, Nivé Lynge Biilmann, attavigiuk, uunga e-mail: nilp@nanoq.gl imaluunniit oqarasuaat: +299 34 66 17
