Tjenestemandit soraarnerussutisiallit atugaat pillugit suliami assigiinngisitsinermut Naalakkersuisut naaggaarput

Tallimanngornermi ulloq 25. oktober 2024-mi Aningaasaqarnermut Akileraartarnermullu Naalakkersuisoq Erik Jensen danskillu finansministeriat Nicolaj Wammen ataatsimiipput. Tamatumani tjenestemandit soraarnerussutisiallit atugaasa siunissami pitsanngorsarnissaat ilaatigut oqaloqatigiissutigineqarpoq. Qallunaat Naalakkersuisui ukiup tulliani (2025-imi) naalagaaffiup Kalaallit Nunaanni tjenestemanditut atorfeqartitai pillugit inatsisissatut siunnersuummik Folketingimi kiisalu Naalakkersuisut Inatsisartuni suliarineqartussamik saqqummiussinissaat, ataatsimiinnermi finansministerip Nicolaj Wammenip oqaatigaa.

Suliami pingaarutilimmi siuariarnerit maanna pisut iluarisimaarlugit Naalakkersuisup Erik Jensenip oqaatigaa. “Ukiuni amerlavallaani nunaqqatitta akissaatimikkut assigiinngisitsivigineqarsimanerat akerleraara, maannalu qallunaat kalaallillu politikkeriisa akornanni tamatumap sukumiisumik iliuuseqarfiginiarneqarnera alloriarnertut pisariaqartutut pingaarutilittullu isigaara”, Erik Jensen oqarpoq. Ataatsimiinneq sioqqullugu aamma pilertortumik siuariartoqarnissaa finansministerimut saaffiginnissutigisimallugu erseqqissarpaa. "Kalaalleqatittaarlallit Danmarkimut piumassuserinngisaminnik nuuttariaqalertarnerat allanngortariaqarpoq. Tassami Danmarkimut nuunnermikkut aningaasarsiaqarneruniarlutik ilaquttatik, kammalaatitik nunannguartillu asasartik qimattariaqalersarnera akuersaarneqarsinnaanngilaq. " Naalakkersuisoq Erik Jensen oqarpoq.

Inatsisissamik suliaqarnerup qanimut malinnaaffiginissaa, tjenestemandillu soraarnerit assigiinnerusumik pineqarnissaannik qulakkeerinnittumik aaqqiissuteqarnissaq Naalakkersuisut alaatsinaassagaat Naalakkersuisup erseqqissaatigaa. Suliaq Naalakkersuisut pingaartippaat, oqaloqatigiinnerillu maanna ataatsimoorluni aallussisoqarnera uppernarsarpaat.

Paasissutissat sukumiinerusut pillugit uunga attaveqarit: Siunnersortit pisortaat Simon Mogensen, Aningaasaqarnermut Naalakkersuisoqarfik, Kalaallit Nunaat, +299 34 65 78, Email simog@nanoq.gl