Atuartiguk
Nunat tamalaat akornanni Nuummi mittarfittaassap ammarnissaa, nunami attaveqaasersuutit ineriartortinneqarnerini pingaarutilimmik killiffiuvoq. Nuummi mittarfittaassap ammarneratigut aamma Ilulissani, Qaqortumilu mittarfittaassat ammarnerisigut nuna avataanit annerusumik tikinneqarsinnaalissaaq.
Kalaallit Nunaanni periarfissat ukkatarilersinniarlugit, inuussutissarsiutitigullu siunissami suleqatigineqarsinnaasut pilerisaarniarlugit Visit Greenland, Greenland Airports A/S, Royal Greenland A/S aamma Air Greenland A/S peqatigalugit Naalakkersuisoq Naaja H. Nathanielsen USA-meeqqammerpoq.
Takornarialerinerup iluani periarfissaasut immikkut ukkataralugit, aaqqissuussinermut marluusunut Naalakkersuisut qaaqqusipput. Taassumap saniatigut suleqatigisanik kiisalu aningaasaliisartunik Kalaallit Nunaanni inuussutissarsiutinik ineriartortitsinissamik soqutigittunik ataatsimeeqateqarnermi Naalakkersuisoq peqataavoq.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen, ima oqarpoq:
”Politikkikkuinnaanngitsoq, aammali inuussutissarsiutigut, kulturerpullu eqqarsaatigalugit Kalaallit Nunaat soqutigineqartoq ersarippoq. Nunarsuarmi timmisartortitseqatigiiffinni anginersat ilaat, United Airlines, New Yorkip aamma Nuup akornanni toqqaannartumik angallavimmik ammaaniarnera amerikkarmiunit tupinnaannartumik tigulluarneqarpoq. Nuummiinnaanngitsoq, nunamili tamarmi tikeraartoqarnissatsinnut piareersimassalluta qulakkiissavarput. Aningaasaliisartunik, suleqatigisanillu ataatsimeeqateqarnermi malunnarpoq, pingaartumik takornarialerinermut, imermut sermimullu aamma aatsitassanut tunngasut aningaasaliiffigissallugit aamma soqutigineqartut. Periarfissaqartoq angalanerup uppernarsarpaa. Ataatsimeeqatigiinnerit sapaatip akunnerini, qaammatinilu tulliuttuni malitseqartissavagut, suleqatigiinnerlu annertusarlugu.”
Niuernermut tunngasunik eqqartuinerit kulturimut tunngasunik akunnilertarumallugit, angalanermi sumiiffinni arlalinni Vilhelm Lyngep Erinarsoqatigiivi erinarsoqatigiipput. Ilaatigut nunarsuarmi oqaluffissaarsuarni anginersat arfernganni Washington D.C.-mi National Cathedralimi kiisalu uumassusililerineq pillugu katersugaasivimmi Smithsoniansimi, aamma Washington D.C.-miittumi erinarsorput.
“Erinarsoqatigiit erinarsornerisigut kulturitta, oqaluttuassattalu eqqartornissaannut patsisissaqarluartitsipput. Sumiikkaluarunik erinarsoqatigiit tigulluarneqarput, qularnanngitsumillu Kalaallit Nunaat annerusumik soqutigineqalersillugu” Naaja H. Nathanielsen oqarpoq.
Attavissaq:
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Email: isiin@nanoq.gl oqarasuaat: +299 34 50 00