Naalakkersuisut eqqakkat pillugit nalunaarut 31. juuli 2025-p tungaanut allanngortippaat – nunatsinnilu kommunit ammaannartumik ikuallaanissamut piffissami sivisunerusumi periarfissillugit

Naalakkersuisut aalajangerput, eqqagassalerinermut nalunaarummi § 37, imm. 3, ammaannartumik ikuallaasarallarnissamut immikkut ittumik akuersissuteqarnerup sivisunerpaamik qaammatini pingasuni tunniunneqarsinnaaneranut piumasaqaammut 31. juuli 2025-p tungaanut immikkut akuersissuteqartoqarsinnaasoq. Kommunit taamaalillutik siornatigumut naleqqiullugu piffissami sivisunerusumi ammaannartumik ikuallaasarallarnissaminnut maanna periarfissaqalerput.

Naalakkersuinikkut Ataqatigiissaarisoqatigiit 12. aamma 13. septembari 2024-mi ataatsimiinneranni Naalakkersuisunit aamma kommuninit tamanit oqaatigineqarpoq 2025-p qiteqqunnerata tungaanut ammaannartumik ikuallaasarallarnissamut immikkut akuersissuteqartoqarnissaa kissaatigineqartoq. Eqqagassalerinermik suliassaqarfimmi annertuunik unammilligassaqarnera, tamatumalu innuttaasunit akornutigineqarlunilu kipiluttunartinneqarnera Naalakkersuisut akueraat. Eqqakkanik ikuallanneqarsinnaasunik avatangiisinut tunngatillugu tamatigut eqqortumik ikuallaasarnissaq Naalakkersuisut pingaartippaat, taamaattumillu ESANI A/S nuna tamakkerlugu eqqakkanik sapinngisamik amerlanerpaanik aallertarpoq Danmarkimilu eqqakkanik ikuallaavimmi ikuallagassanngorlugit assartortarlugit. Nunali tamakkerlugu eqqakkanik ikuallaavissat marluusut 2025-p qiteqqunnerani naammassinissaasa tungaanut eqqakkat ajornartorsiutaanerat innuttaasunut malunnaateqaannartussaallunilu akornutaaginnartussaavoq, taamaattumillu Naalakkersuisut aalajangerput eqqakkat pillugit nalunaarummi allannguisoqarnissaanik akuersipput:

”Innuttaasut peqqissusaannut avatangiisittalu paarilluarneqarnissaannut tunngatillugu eqqakkanik ajornartorsiuteqarnerup naleqqunnerpaamik aaqqiissuteqarfiginissaa pillugu kommuninik anguniagaqarfiusumik oqaloqateqarneq Naalakkersuisut ingerlateqqikkusuppaat. Ammaannartumik ikuallaasarnerit sapinngisamik pisinnaatillugu pinngitsoortinneqarnissaannik isumaqarnera attatiinnarpara. Aammali nassuerutigisariaqarlugu nuna tamakkerlugu eqqakkanik ikuallaaviit marluusut naammassinissaasa tungaanut eqqakkanut tunngatillugu ajornartorsiut annertujuassasut. Tamannalu isiginngitsuusaarsinnaanngilarput, taamaattumillu Naalakkersuisut aalajangerput 31. juuli 2025-p tungaanut eqqakkat pillugit nalunaarummi piumasaqaammut immikkut ittumik akuersissuteqartoqarsinnaasoq. Kommunit taamaalillutik – tigussaasumik qinnuteqaateqarnermikkut – 31. juuli 2025-p tungaanut ammaannartumik ikuallaasarallarnissamut immikkut ittumik akuersissummik tunineqarsinnaapput”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Kommunit ammaannartumik ikuallaasarallarnissaminnut piffissami sivisunerusumi periarfissaqassapput
Eqqakkat pillugit nalunaarummi § 37, imm. 3 Naalakkersuisut ammaannartumik ikuallaanissamut immikkut akuersissuteqarnissaannut periarfissiivoq, immikkulli akuersissut sivisunerpaamik qaammatini pingasuni atuutsinneqartarpoq. Taamaattumillu Naalakkersuisut – nunatsinnilu kommunit politikkikkut kissaateqarnerat tunngavigalugu – nalunaarummut allannguutissamik suliaqarput nuna tamakkerlugu eqqakkanik ikuallaaviit tamakkiisumik ingerlalernissaasa tungaanut atuuttussamik. Nalunaarummut allannguummi pineqartumi Naalakkersuisut 31. juuli 2025-p tungaanut ammaannartumik ikuallaanissamut immikkut akuersissuteqarnissaminnut periarfissaqalissapput. Kommunillu taamaalillutik siornatigumut naleqqiullugu ammaannartumik ikuallaanissamut piffissami sivisunerusumi periarfissaqalissapput – immikkullu akuerineqarnissamik qinnuteqaat akuerineqareerpat qaammatit pingasut qaangiunnerini immikkut akuerineqarnissamik qinnuteqaammik nutaamik nassiusseqqittariaqassanngillat.

Kommunit eqqagassalerinermut aamma eqqakkanik igitsinissamut akisussaaffeqarnerat
Eqqagassalerinermut suliassaqarfik Naalakkersuisut aamma kommunit akornanni agguagaavoq. Tamatuma kingunerisaanik kommunit eqqagassalerinermut eqqakkanillu igitsisarnermut akisussaaffeqarlutik pingaarnertut oqartussaapput. Inatsisini pisariaqartunik tunngavissaqarnissap qulakkeernissaa kiisalu kommunit qanimut suleqatigalugit eqqagassalerinermut suliassaqarfiup ineriartorteqqinnerata malinnaaffiginissaa – peqataaffiginissaalu - Naalakkersuisut akisussaaffigaat.

Eqqagassalerinermut suliassaqarfimmi kommunit tapersersorniarlugit Naalakkersuisut ukiuni kingullerni pingasuni 19 millioner koruuninit amerlanerusunik tapersiisimapput, ilaatigut 2022-mi aamma 2023-mi eqqakkanik katersuilluni angalanissanut. Taamaattoq – immikkut aningaasassanik aningaasaliisoqaraluartoq – eqqakkat ajornartorsiutaanerat suli annertoorujussuummat, Naalakkersuisut ESANI A/S-imut immikkut ittumik 3,2 mio. koruuninik tapiissuteqarput 2024-mi eqqakkanik katersuilluni angalanerit ataatsimik ilaneqarnissaannut. Eqqakkat pillugit nalunaarutip allanngortinneqarnerata aammalu 2024-mi eqqakkanik katersuilluni angalanerup nunatsinni eqqakkat annertussusaannik malunnaatilimmik annikillisitsinissaat naatsorsuutigineqarpoq nuna tamakkerlugu eqqakkanik ikuallaaviit nutaat tamakkiisumik ingerlalernissaasa tungaanut.

Paasissutissat amerlanerusut pillugit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi naalakkersuisup allattaa Manasse Berthelsen saaffigineqarsinnaavoq, oqarasuaatikkut: +299 34 56 03 / 54 88 68 imaluunniit e-mailikkut: mabr@nanoq.gl imaluunniit pan@nanoq.gl