Naalakkersuisut Sikuki Nuuk Harbour A/S-imut ASN akueraat, taamaalillutik Qeqertaq Avallermi umiarsualiviup allilerneqarnissaa kilisaatinullu terminalimik pilersitsinissaq pisinnaanngorput

Naalakkersuisut 8. novembari 2024-mi Qeqertaq Avallermi containerinut terminalip pioreersup kujataatungaani umiarsualiviup allilerneqarnissaanut aamma kilisaatinut terminalimik pilersitsinissamut ASN akueraat. ASN-imut akuersissut sanaartortitsisumut Sikuki Nuuk Harbour A/S-imut tunniunneqarpoq.

ASN-imut akuersissut ASN-imut nassuiaat aammalu tamanut ammasumik tusarniaaneq 5. juuli 2024-mit 30. aggusti 2024-mut ingerlanneqartoq tunngavigalugit tunniunneqarpoq. ASN-imut akuersissuteqartoqarneratigut, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup suliatigut naliliinera naapertorlugu, Naalakkersuisut naliliipput umiarsualiviup allilerneqarnera avatangiisit ataqqillugit ingerlanneqassasoq.

Umiarsualiviup allilerneqarnera siunissaq eqqarsaatigalugu nunamit sarfalersuutinik pilersitsisoqarsinnaaneranik ammaassaaq, taamaaliornikkut umiarsualiveqarfimmit innaallagissamik mingutsitsinngitsumik pilersuisoqarsinnaalissalluni. Tamannalu silap pissusianut avatangiisinullu iluaqutaassaaq, umiarsuit talinnganerini sarfaliuutit umiarsuarniittut qaminngatinneqarsinnaassammata. Umiarsualiviup allilerneqarnera aamma Nuummut tunngatillugu umiarsualiveqarnermi atortulersuutinik sunniuteqarnerusunik naleqqunnerusunillu periarfissaqalersitsissaaq, aammalu aalisakkanik tunisassianik nioqqutinillu oqimaatsunik allanik usingiarnissamut periarfissanik pitsaanerusunik ammaassissalluni.

ASN sunaana?
ASN Avatangiisinut Sunniutinik Naliliinerup naalisaatigaa. ASN-imut nassuiaat suliassap avatangiisinut kingunissaanik tulleriiaaraluni saqqummiussinernik imaqartussaavoq. ASN-imut nassuiaat aamma suliniutinik, avatangiisinut kingunerluutaasussanut akiuiniarnermi atorneqarsinnaasunik imaqassaaq.

ASN-imut akuersissut sunaana?
ASN-imut nassuiaat tunngavigalugu sanaartukkap avatangiisinut sunniutissai akuersaarneqarsinnaanersut, kiisalu suliniutissami ASN-imut akuersinissamut piumasaqaatit suussanersut Naalakkersuisunit isummerfigineqassaaq.

Inatsit
ASN-ip susassaqarfiup maleruarpai:

• Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27 marts 2013-imeersoq.
• Avatangiisit innarlitsaaliorneqarnissaanik Inatsisartut inatsisaat nr. 9, 22. novembarimeersoq (kapitali 8)

Maalaaruteqarneq
Aalajangiinermut maalaaruteqarniaraanni Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit tiguneqassaaq, Postboks 1614, 3900 Nuuk, imaluunniitt pan@nanoq.gl kingusinnerpaamik ulloq 20. december 2024.

ASN-imut akuersissut uani atuarneqarsinnaavoq

Paasisaqarnerorusukkaanni Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup e-mailiatigut attavigineqassaaq: pan@nanoq.gl