Naalakkersuisut Præsident Donald Trumpimut USA-mi qinersisoqarnera pillugu pilluaqqusipput

Amerikami innuttaasut qinersipput, Naalakkersuisuniillu qinersinermi ajugaasuusoq Donald Trump pilluaqquarput. Ukiuni sisamani tulliuttuni amerikamiut naalakkersuisussaannut Præsident Trump innuttaasunit tunuliaqutserneqarluarluni siuttussatut qinerneqarpoq.

Præsident Joe Biden aqutsisuunermini pitsaasumik ajunngitsussarlu anguniarlugu suleqatigilluarsimaneranut Naalakkersuisunit qujaffigerujussuarparput. Nunatta USA-llu akornanni pingaarutilinnik arlalinnik suleqatigiiffiusunik siuariartoqarpoq, taakkunaniillu assersuutigalugu nuannersutut oqaatigineqarsinnaavoq amerikamiut nunanut allanut ministeriata Anthony Blinkenip nunatsinnut tikeraarnera. Suleqatigiilluarnerup tamatuma pitsaasup Præsident Trumpimit siuttuuffigineqalersussap ingerlatiinnarneqarnissaanut Naalakkersuisut qilanaarput.

Nunatta Nunanut Allanut Sillimaniarnermut Illersornissamullu periusissaata piviusunngortinnissaanut Naalakkersuisut sulinertik ingerlateqqissavaat, tassanilu USA-mik suleqateqarnerup nukittorsarneqarnissaa ilaavoq, ilaatigut amerikami avannarlermi issittumi oqalliffimmik pilersitsinissaq.

Permanent Committeemi Joint Committeemilu suleqatigiinnerup pitsaasup ingerlateqqinnissaanut Naalakkersuisut qilanaarput, naalakkersuisuulersussallu nutaat Nunatta USA-llu akornanni suleqatigiinnermi periarfissat, pingaartumik niuernikkut aqqutissat pitsaasut ujartornissaannut suleqatigiinnissamut peqataassaagut.

Issittumi Siunnersuisooqatigiinni siulittaasuuneq ukiup tulliani Kunngeqarfimmit tiguneqassaaq, tassanilu Nunarput aqutsisooqataasutut pingaarutilimmik inissisimassaaq. Tassani siulittaasuuffimmi Naalakkersuisut USA-mik suleqateqarnissaq qilanaaraat, naalakkersuisuulersussallu issuttumi pingaartitaannik tusarnissaq qilanaaraarput.

Sillimaniarnikkut nunarsuartsinni unammillernartumi inissisimavugut. Taamaattumillu nunat assingusumik eqqarsartaasillit aallalumi iligisavut, soorlu USA Issittut sakkulersuuffiunnginnissaanut suleqatigiinnerup ingerlatiinnarnissaa aalajangiisuulluinnassaaq.

”Naalakkersuisut sinnerlugit Præsident Donald Trumip qinigaaneranut pilluaqqusivugut. USA nunarujussuuvoq, qanimullu suleqatigaarput sanileralugulu pingaarutilik. USA-mik attaveqarnerup ineriartortittuarnissaata ingerlatiinnarnissaanut qilanaarpugut, taamatullu akornatsinnik niuernikkut ineriartortitsinissamut sulinerup ingerlateqqinnissaanut qulanaarluta.” taama oqaaseqarpoq Naalakkersuisoq Vivian Motzfeldt.


Annertunerusumik paasissutissanik pissarsiumagaanni Naalakkersuisumut allatsi Naasunnguaq B Kristensen +299 345682, imaluunniit e-mail: nabk@nanoq.gl atorlugit attavigineqarsinnaavoq.