Ilisimatusarnerup iluani inatsisitigut malittarisassiuussinissamut periarfissat pillugit oqaloqatigiinnerup immikkoortup aappaani aappassaanik oqaloqatigiinneq

Kalaallit Nunaanni ilisimatusarnerup iluani inatsisitigut malittarisassiuussinissamut periarfissat pillugit oqaloqatigiinnermi immikkoortup aappaata ippassaq 2024-mi novembarip 5-iani, ullumikkullu 6-iani ingerlanneqarnissaanut Kalaallit Nunaanni ilisimatusarnermik ingerlatsisut Naalagaaffinngornissamut Nunanullu allanut Naalakkersuisup Vivian Motzfeldtip aggersarpai. Ullormi siullermi oqaloqatigiinnermi ilisimatusarnermik ingerlatsisut Kalaallit Nunaanni ilisimatusarnerup iluani ileqqorissaarnissamut nunami tamarmi siunissami najoqqutassiornissamik eqqartuimmata, oqaloqatigiinneq siulleq naammassisaqarfiulluarpoq.

Ilisimatusartut nunat assigiinngitsut akornanneersut Kalaallit Nunaanni ilisimatusarnerat, sunniuteqarnerallu ullup aappassaani oqaloqatigiinnermi eqqartorneqarput. Nunat assigiinngitsut akornanni ilisimatusartut Kalaallit Nunaanni ilisimatusarnerat ilaatigut nuna iluaquteqarsinnaalluaqqullugu, ilisimatusarnermi sinaakkutit qanoq pitsanngorsarneqarsinnaassanersut oqaloqatigiissutigineqarpoq. Naalakkersuisummi takorluugaat, Kalaallit Nunaanni ilisimatusarnermut 2022-2030-mut periusissiami (”Ilisimatusarneq – ineriartornermut aqqutissaavoq”) allaatigineqartoq tassaammat, ilisimatusarneq nunat assigiinngitsut akornannut paasisimasaqarluassasoq, pingaarnertulli ilisimatusarneq nunamut iluaqutaassasoq.

Aappassaanik oqaloqatigiinnermi ilisimatusarnermik ingerlatsisut peqataanerinut Naalakkersuisup Vivian Motzfeldtip qutsavigai.

Naalakkersuisoq Vivian Motzfeldt ima oqarpoq: ”Oqaloqatigiinnerni taakkunani oqallinnerit pingaaruteqarput, ilisimatusarnermillu ingerlatsisut tunniussaat pingaaruteqaqaat. Ilisimatusarnerup iluani inatsisiliassamut immersuinissaq pingaaruteqarluinnarpoq tamannalu qilanaaraarput”.