AtuartigukAvatangiisinut Aningaasaateqarfik ukioq 2025-imi suliuniutinut qinnuteqartitsissanngilaq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Avatangiisinut Aningaasaateqarfik 2018-imi Inatsisartut aalajangiinerat tunngavigalugu pilersinneqarnermi kingorna iluatsilluarsimavoq. 2024-mi suliniutit pissanganartut arlallit 2025-mi ingerlaqqittussat aallartisarneqarsimapput. Tamannalu pissutigalugu 2025-mi suliniutinut qinnuteqartitsisoqassanngilaq.
”Avatangiisinut Aningaasaateqarfik ukiut ingerlanerini suliniutinut avatangiisinut pitsanngorsaataasussanut koruuninik millionerpassuarnik tapersersuisimavoq, aningaasaateqarfiullu ukiumit ukiumut aningaasaliissutigisartagaasigut angusartakkavut naammagisimaarluarpakka. Ajuusaarutigaarali 2025-mi suliniutinik amerlanerusunik tapersersuisinnaannginnama. Aningaasassat eqqagassalerinermuunerusoq immikkoortinneqarput, tamannalu Nunatsinnut pitsaanerpaamik pingaarnersiuinerusoq isumaqarpunga.” – Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Avatangiisinut Aningaasaateqarfiup 2024/25-mut aningaasaliissutissai nuna tamakkerlugu eqqakkanik ikuallaavinnik marlunnik sanaartornissamut, aammalu kommunit, inuussutissarsiortut namminersortullu suliniutaannut tapiissutissatut immikkoortinneqarput.
Avatangiisinut Aningaasaateqarfik suua?
Inatsisartut 2018-imi Ukiakkut Ataatsimiinnermi aalajangerput, Avatangiisinut Aningaasaateqarfik nuna tamakkerlugu avatangiisinik pitsanngorsaanissamik suliaqarnermut tapersiissuteqarfiusartussaq pilersinniarlugu. Ukiut tamaasa suliniutinut, avatangiisinut iluaqutaasunut aningaasanik immikkoortitsisoqartartussaavoq.
Annertunerusumik paasisaqarusunnermi Naalakkersuisumut allatsi Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.