Ilisimatusarnerup iluani inatsisitigut malittarisassiuussinissamut periarfissat pillugit oqaloqatigiinnerup immikkoortup aappaa

Kalaallit Nunaanni ilisimatusarnerup iluani inatsisitigut malittarisassiuussinissamut periarfissat pillugit oqaloqatigiinnermi immikkoortup aappaata 2024-mi novembarip 5-iani, 6-ianilu ingerlanneqarnissaanut Kalaallit Nunaanni ilisimatusarnermik ingerlatsisut Naalagaaffinngornissamut Nunanullu allanut Naalakkersuisup Vivian Motzfeldtip aggersarpai.

Kalaallit Nunaanni ilisimatusarnermik ingerlatsisut aappassaanik oqaloqatigiinnissamut aggersarneqarput, tassani siullermeertumik oqaloqatigiinneq aasaq ingerlanneqarluni. Oqaloqatigiinnermi Katuap Inersuaaraanni ingerlanneqartussami peqataasut 30-35-ussapput.

Ilisimatusarnerup iluani ileqqorissaarnissamut nunami tamarmi najoqqutassat aamma nunat assigiinngitsut akornanni ilisimatusartut Kalaallit Nunaanni ilisimatusarnerat oqaloqatigiinnermi tassani eqqartorneqassapput.

Kalaallit Nunaata iluani ilisimatusarnermi ileqqorissaarnissamut nunami tamarmi najoqqutassiornissaq, Kalaallit Nunaanni ilisimatusarnermut 2022-2030-mut periusissiami (”Ilisimatusarneq – ineriartornermut aqqutissaavoq”) anguniagaavoq.

Nunat assigiinngitsut akornanni ilisimatusartut Kalaallit Nunaanni ilisimatusarnerat eqqartorneqassaaq, nunallu tamalaat akornanni ilisimatusartut nunami ilisimatusarnerinik ilaatigut nuna iluaquteqarsinnaalluaqqullugu, ilisimatusarnermi sinaakkutit qanoq pitsanngorsarneqarsinnaassanersut oqaloqatigiissutigineqassalluni.

Kalaallit Nunaanni ilisimatusarnerup iluani inatsisitigut malittarisassiuussinissamut tunngavissiornissamik qulakkeerinnissalluni siunissami ukiorpaalunni suliassamut, sapaatip akunnerani uani oqaloqatigiinnerit taakkua marluk ilaapput.

Maani nunami ilisimatusarnermik ingerlatsisut isumaat, misilittagaasalu tusarnissaannut Naalakkersuisoq Vivian Motzfeldt qilanaarpoq.
Naalakkersuisoq Vivian Motzfeldt ima oqarpoq: ”Ilisimatusarnerup iluani suut pitsanngorsarneqarsinnaanerinut Kalaallit Nunaanni ilisimatusarnermik ingerlatsisut isumaat eqqarsaatigalugit, oqaloqatigiinnermi immikkoortoq siulleq arlalitsigut siunnerfiliilluarpoq. Sammisat taakkua marluk aallaavigalugit, inuiaqatigiinnitsinni suut iluaqutigisinnaanerlutigit itisiliisinnaalerpugut. Kalaallit Nunaanni ilisimatusarneq maani nunami uagutsinnut iluaqutaassasoq, matumani nammineq ilisimatusarnitsinnut iluaqutaanissaa ilanngullugu annerusumik ukkatarineqassaaq”.