Tasiilami, Sermiligaami, Kuummiuni aamma Kulusummi silap pissusia pillugu workshopertitsinermi innuttaasut nipaasa nunami namminermi silap pissusianut periusissiamut ilaatinneqarneqarnissaat qulakkeerneqassaaq

Naalakkersuisut nunami namminermi silap pissusianut periusissiaq suliaralugu aallartippaat. Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund nuna tamakkerlugu nunaqarfinni illoqarfinnilu silap pissusia pillugu sammisaqartitsiniarpoq, innuttaasut silap pissusiata allannguutaani misigisaat isumaallu pingaarnerutillugit akuutinneqarnissaat siunnerfigalugu. Silap pissusia pillugu workshopititsinermi siulliit 22.-25. oktobari 2024-mi Tasiilami, Sermiligaami, Kuummiuni Kulusummilu ingerlanneqassapput.

Inatsisartut 2023-mi Inatsisartut aalajangiinerisa kingunerisaannik Kalaallit Nunaat pisortatigoortumik nunani tamalaani isumaqatigiissummut, Parisimi isumaqatigiissummut ilaalerpoq. Taamaattumik Naalakkersuisut nunami namminermi silap pissusianut periusissiaq suliaralugu aallartippaat. Silap pissusianut periusissiaq nunani namminermi silap pissusianut anguniakkanik suliniutinillu pingaarnernik imaqassaaq, aammalu nunatsinni ineriartornissamut periarfissat aallunneqassallutik.

Innuttaasut silap pissusiata allannguutaani misigisaat aammalu silap pissusianut aaqqiissutissatut isumaat pingaarnerutillugit akuutinneqarnissaat Naalakkersuisunut pingaaruteqarpoq. Taamaattumik Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund nuna tamakkerlugu illoqarfinnut nunaqarfinnullu orniguteqattaassaaq, innuttaasut, inuiaqatigiit najukkanilu sullissisut allat periusissiamut ilanngussinnaasaannik katersuiniarluni. Silap pissusia pillugu sammisaqartitsinerni silap pissusiani allannguutit, aammalu Kalaallit Nunaata Parisimi Isumaqatigiissummut ilaalernerani pisussaaffiit suunersut pillugit saqqummiussisoqassaaq.

Silap pissusia pillugu sammisaqartitsinerit ulluni piffissanilu ukunani Tasiilami, Sermiligaami, Kuummiuni Kulusummilu ingerlanneqassapput:

• Tasiilaq: 22. oktobari 2024, nal. 18:15-21:00, katersortarfimmi.
• Sermiligaaq: 23. oktobari 2024, nal. 18:15-21:00, katersortarfimmi.
• Kuummiut: 24. oktobari 2024, nal. 18:15-21:00, katersortarfimmi.
• Kulusuk: 25. oktobari 2024, nal. 18:15-21:00, katersortarfimmi.

”Innuttaasut silap pissusiata allannguutaannik taakkulu kingunerinik misigisaqartarput – taamaattumillu aamma innuttaasut aaqqiissutaasinnaasunut peqataassapput. Taamaattumik nunami namminermi silap pissusianut periusissiap siulliup suliarinerani innuttaasut nipaasa, annilaangassutaasa, isumassarsiaasa isumaasalu eqqumaffigalugit tusarnaarnissaat uannut pingaaruteqarluinnarpoq. Tasiilamut, Sermiligaamut, Kuummiunut aamma Kulusummut tikeraarnissannut qilanaarpunga, taakkunani silap pissusianut workshopertitsinermi pissanganartut pissarsiaqarfiusinnaasutullu neriuutiginartut aallarnerneqartussaammata. Silap pissusianut suliniutitta pingaarnerit, aammalu ineriartornissamut periarfissat, aammattaaq nunatsinni pigisagut pillugit oqallinnissamut qilanaarpunga”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaaq.