Kalaallit Nunaata ilanngaaserinermut suliassaqarfimmi Danmarkip aamma Savalimmiut suleqatigilluarnerat ingerlatiinnarpaa

Nunatsinni maani Akileraartarnermut Aqutsisoqarfik Danmarkimi aamma Savalimmiuni ilanngaaserinermut oqartussat peqatigalugit ilanngaaserinermut suliassaqarfiup iluani isumaqatigiissutinik marlunnik isumaqatigiissuteqarput. Isumaqatigiissutit Nunani Avannarlerni Ilanngaaserinermut pisortat Stockholmimi ulloq 17. september 2024 ataatsimiinneranni atsiorneqarput. Misilittakkanik paarlaasseqatigiittarnissaq, inuiaqatigiinnik illersuinermut suliassaqarfinni ataatsimoorluni ingerlataqartarneq kiisalu sulisunik qimminillu sulinermi atorneqartunik sungiusaaneq ilinniartitsinerlu ukkataralugit, isumaqatigiissutini ilanngaaserinermi suleqatigiinnerup nukittunerulersinnissaanik Kalaallit Nunaat, Danmarki aamma Savalimmiut neriorsuuteqarfigineqarput.

2024-mi juunimi i Danmarkimi Toldstyrelsenimi pisortap Kalaallit Nunaat tikeraarpaa. Tikeraarnerup taassuma kingunerisaanik Kalaallit Nunaanni Akileraartarnermut Aqutsisoqarfik aamma Danmarkimi Toldstyrelsen maannakkut immikkut pitsaaliuinermik suliaqartalerneq aallartinneqarpoq, taanna atserneqarluni Arsarnerit, inuiaqatigiinni kalaallini aamma danskini innuttaasut illersorneqarnissaannik siunertaqarluni.

Arsarnerit Suliaqartuni siunertaavoq, Kalaallit Nunaanniit Danmarkimut nioqqutissanik aningaasanillu inatsisinik unioqqutitsilluni eqqussiniartarnerup pinngitsoortinnissaanut pitsaaliornissaanullu ataqatigiissaagaasumik suliniuteqarnermik pilersitsinissaq. Peqatigisaanik Danmarkimiit Kalaallit Nunaannut aningaasanik ikiaroornartunillu avammut annissuinerup killilersimaarnissaa suliniuteqarnermi siunnerfigineqarpoq. Tamatumani inuiaqatigiit kalaallit aamma danskit illersorniarlugit nakkutilliinermik nukittorsaasussamik, ingerlaavartumik suliniuteqarnissaq pisariaqarpoq.

Aningaasaqarnermut Akileraartarnermullu Naalakkersuisoq, Erik Jensen oqarpoq:

”Danmarki Savalimmiullu ilanngaaserinermut suliassaqarfimmi suleqatigilluarneqareerput, aammalu ataatsimoorluta suli pitsaanerusumik suliniuteqarnissaq ilisimasanillu avitseqatigiittarnissaq qilanaaraavut. Aaqqissuussaasumik pinerlunniartarnerup akiorniarnerani ilanngaaserinermi oqartussat akornanni killeqarfiit qaangerlugit pisortatigoornerusumik suleqatigiinnissaq annertuumik periarfissaqarfiuvoq. Taamaattumik nunatsinni maani Akileraartarnermut Aqutsisoqarfiup aammalu Danmarkimi Toldstyrelsenip akileraartitsisartunut nalunaarutigineqanngitsumik aningaasaqarnermik, ikiaroornartunik anngiortumik eqqusseriartarnernik akiuisinnaasumik aammalu inuiaqatigiinnik illersuisinnaasumik suliaqarneq aallartissimammassuk nuannaarutigaara.”

Paasissutissanik annertunerusunik piniarnermi attaveqarfigineqassaaq Naalakkersuisup allattaa Nukaaka Tobiassen uani e-mail  nukat@nanoq.gl imaluunniit oqarasuaat  +299 34 55 17

Inussiarnersumik inuulluaqqusillunga

Kim Neumann Nielsen