AtuartigukInternetikkut PNNP pillugu ataatsimiinneq najuuffigineqarluarpoq
Nassiussisuuvoq: Aalisarnermut Piniarnermullu Naalakkersuisoqarfik
Upernaviup nunaqarfiini Innaarsunni, Aappilattumi aamma Tasiusami umiatsiaararsortut namminneerlutik aalajangigassaannik pisassiissutit niuerutigineqarsinnaasut nammineq pigisat, PNNP, pillugit internetikkut, teamsikkut, ippassaq oktobarip pingajuanni 2024-mi nassuiaanneqarnissartik atorluarpaat.
Soqutiginnillutik nunaqarfiit innuttaasut sulliviini pineqartuni katillutik 80-it missaanniittut najuuttut naalaarlutillu aperinissaminnut periarfissaqarput. PNNP-mik nassuiaassineq Avannaata kommuniata Upernavimmi immikkoortortaanit ingerlanneqarpoq.
Aalisarnermut Piniarnermullu Naalakkersuisoqarfik isumaqarpoq internetikkut misiliilluni ataatsimiititsineq pitsaasoq, isumaqarlunilu internetikkut umiatsiaararsortut siunissami ataatsimeeqatigineqarsinnaasassut.
Upernavimmi Upernaviullu pigisaanni PNNP pillugu ataatsimiinnernut peqataasut amerlasuutut oqaatigineqarsinnaapput, Nuussuarmi, Kullorsuarmi, Upernavik Kujallermi aamma Upernavimmi paasititsiniaanermut ataatsimeeqataasut 85-it missaaniimmata, internetikkullu ippassaq ataatsimeeqataasut 80-it missaaniillutik.
Kinaluunniit umiatsiaaqqamik aalisartoq qaleralinniarnissamut aqutsiveqarfimmi 47-mi, Upernavimmi, Uummannami aamma Qeqertarsuup Tunuani aalisarnissamut akuersissuteqartoq PNNP tunngavigalugu januaarip aallaqqaataani 2025-mi aalisalersinnaavoq. PNNP-mik aalisalernissaq nammineerluni qinigassaavoq, taannalu ukiut tamaasa januaarip aallaqqaataanit aalisalernissamut qinnutigineqarsinnaalluni. PNNP tunngavigalugu januaarip aallaqqaataanit 2025-mi aalisalernissamut qinnuteqarfissaq ulloq kingulleq tassaavoq oktobarip 15-iat 2024. Paasissutissanik amerlanerusunik perusukkuit uunga allassinnaavutit: apn@nanoq.gl Paasissutissanik amerlanerusunik paasisaqarusukkuit unnga allassaatit: apn@nanoq.gl