AtuartigukIsumaqatigiissitsiniarnermut eqqartuussiviup piginnaatitaanertik pillugu apeqqut suliariniarpaa
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Greenland Minerals A/S-ip Namminersorlutik Oqartussat suliakkiullugit naammagittaalliuutaata Isumaqatigiissitsiniarnermut eqqartuussivimmi suliarineqarnerani suliarinninneq ingerlaqqilaarpoq.
Namminersorlutik Oqartussat suliakkiullugit naammagittaalliuutit suliarineqarnissaannut tunngatillugu Isumaqatigiissitsiniarnermut eqqartuussiviup piginnaatitaaneranut apeqqut immikkoortillugu suliarineqassasoq pillugu Isumaqatigiissitsiniarnermut eqqartuussiviup aalajangernera Namminersorlutik Oqartussat ulloq 2. oktober tiguaat.
Naammagittaalliuuterpiaap suliarineqannginnerani apeqqutip taassuma paasinarsisinneqarnissaa Namminersorlutik Oqartussanit pingaaruteqarsimavoq.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:
”Isumaqatigiissitsiniarnermi suliassaq taanna maannakkut ukiut marluk sinnerlugit ingerlareersimalerpoq, aammalu Isumaqatigiissitsiniarnermut eqqartuussivik suliassap taassuma suliarinissaanut qanorluunniit piginnaatitaasoq isumaqanngitsugut uparuarnissaa, Namminersorlutik Oqartussat tungaanniit aallaqqaataaniillu pingaartinneqarsimavoq. Namminersorlutik Oqartussat naalagaaffiullu naliliinerat suli tassaavoq, suliassaq itigartinneqassasoq.”
Isumaqatigiissitsiniarnermut eqqartuussivik taamatuttaaq aalajangerpoq, apeqqut pillugu pingaarnertigut isumaqatiginninniarnissamut ullut tallimat atugassiissutigineqassasut. Immikkoortitsinissaq pillugu pingaarnertigut isumaqatiginninniarnerit qaqugu ingerlanneqassanersut, suli aalajangiiffigineqanngilaq.