Pilersitsivissani sulisussat pikkorissaqatigiissinneqarput

Naalakkersuisut Suliffeqarnermut periusissiaanni 2022-2024-mi Naalakkersuisuni politikkikkut anguniakkat tunngavigalugit sinerissami atuarfinnik produktionsskoletut ingerlaasilinnik pilersitsiortortoqarnissaa aalajangiunneqarpoq. Taakkua Pilersitsivinnik taaguuserlugit aallartinnissaanut piareersarnerit ingerlarsorput, inuusuttullu sulliviini ilinniartitsisut aqutsisullu pikkorissaqatigiissinneqarput 23. – 25. september 2024-imi Majoriaq Nuup sannaviani Piorsaavimmi.

Pilersitsivinnik pilersitsinissaq pillugu 2022-mi ataatsimiitsitaliaq misissuilluinilu inassuteqaasiortussaq pilersinneqarpoq, inassuteqaatillu 2023-mi Naalakkersuisunit akuerineqarmata, kommunit ilinniarfeqarfiillu suleqatigalugit aallarnisaaneq ingerlanneqalerpoq.

Kommunit 5 peqatigalugit Majoriaqarfiit ataanni Pilersitsivinnik inuusuttunut sullivinni atuartitsisarnermik inerisaaneq ingerlavoq. Kommuneqarfiit illoqarfiit aallarnisaaffioqqaartussat toqqarpaat tassaasut: Ilulissat, Aasiaat, Sisimiut, Paamiut Narsarlu aallaqqaasiutigalugit inerisaaffigineqassasut. Illoqarfiit taasat ilaatigut inuusuttunut sulliveqarfioreerput, ilaallu massakkut illlutassaannik ujartuileruttorlutik.

Inuussutissarsiutinik ilinniarfeqarfiit qanimut suleqatigineqarnerannut pissutaavoq, siunertaammat inuusuttut Pilersitsiviit aqqutigalugit ingerlasimasut ajornannginnerusumik inuussutissarsiutigalugu ilinniarfeqarfinnut ikaarsaarsinnaalernissaat.

Pilersitsiviit ukioq 1 missaannik ingerlareersimalerpata aallarnisaaneq naliliiffigineqassaaq isummerfigineqarlunilu illoqarfinnut allanut Majoriap ataani sulliveqarfioreersunut siammarsinnaanersoq.

Pilersitsivinnik aallarnisaanermi suliat ilaat. PBL-imik pikkorissartitsineq

Sullivinni timi atorlugu atuartitseriuseqarneq pillugu, sullivinni ilikkarfiulluartumik atuartitsinerup pitsaanerusumik aaqqissuussinnaalernissaa atuartitsissutinillu assigiinngiiaartunik periuseqarfiusinnaanissaa siunertaralugu atuartitsiseriuseq PBL
(PBL Projekt Baseret Læring, suliassamik aaliangersimasumik aallaaveqarluni sullivimmi atuartitsineq) Pilersitsivinni ilinniartitsisunut aqutsinullu pikkorissaassutigineqarpoq.

PBL-imi atuartitseriaatsimi pingaartuuvoq inuk tamakkiisoq isigalugu atuartitsinissaq. Taamaasilluni sullivimmi atuartitsinermi suliatigut ilikkagassat piinnarnagit aamma inuup ileqqui, suliaqarnerminullu tunngasutigut isumaliortaasii ilanngullugit atuartitsinermi sammineqartarput.

Illoqarfinni taasaniit sulisut katillugit 15-it pikkorissarneqartussaagaluartut, ajoraluartumik marluk peqquteqartumik pisinnaajunnaarmata inuit 13-it pikkorissartinneqarput. Pikkorissartitsinermi suliffeqarfik Danmarkimeersoq www.klimazirkus.com suleqatigineqarpoq.

Uani link-imi https://www.klimazirkus.com/pilersitsiviit videoaqqat assigiinngitsut 3 takuneqarsinnaapput, taakkua ilaanni pikkorissartut PBL-imik tunngaveqarluni inuusuttunik atuartsinermi suut anguniarneqarsinnaanerinik oqariartuutaat naatsukullaat takusassaapput.

PBL modulini marlunni pikkorissaassutigineqartussaavoq, Modul 1 23-25.september Nuummi ingerlanneqarami naammassereersimalerpoq, Modul 2 15-18. November, 2024-mi Nuummi ingerlanneqassaaq.

Inuusuttut piginnaasaannik nalilersuisarnissaq
PBL-imik pikkorissaanissaq sioqqullugu, ataatsimiitsitaliaaraq soqutigisaqatigiinnit ukunannga: Sulinermik Inuussutissarsiutillit Kattuffiat (SIK) Inussuk, Kommuneqarfik Sermersooq, Kalaallit Nunaanni Teknikkimik Ilinniarfik (KTI)-mit inuttaqartoq sulivoq. Taakkua suliaraat inuusuttunut atuartitsinermi inuusuttut peqatigalugit nalilersuutigineqartartussanik kalaallisoortunik atortussanik inerisaaneq. Taakkua tunngavigalugit inuusuttut, inuttut aammalu atuartitsissutigineqartuni fag-itigut ineriartornerat ersittumik takussutissaqarnissaa suliniutaavoq, taamaasiornikkut inuusuttut namminneerlutik takusinnaalerniassammassuk qanoq ineriartorusaarnerlutik.

Nalilersuutit assigiissaarneqarnerannut siunertaasut ilagaattaaq, Pilersitsiviit
Inuussutissarsiutigalugu ilinniarfeqarfinnut qanittumik suleqateqarmata imlt. sumiiffigisaminni inuussutissarsiortunik suleqateqarmata. Taamaattumik inuttut ileqqunut nalilersuutit, fag-itigullu ineriartornermik nalilersuutit ersittumik takussutissaqalerpata, naatsorsuutaavoq inuusuttut ajornannginnerusumik inuussutissarsiutigalugu ilinniarfeqarfinnut imlt. suliffeqalernissamut ikaarsaarsinnaalernissaat angujuminarnerulissasoq.

Pisussat allat:
Naatsorsuutaavoq kommunit tamarmik ukioq 2025 aallartinneranni Pilersitsivittut ingerlaasilinnik atuartitseriuseqarnissartik piareersimaffigissagaat. Ukiaaneranilu illoqarfiit Pilersitsiveqarfiusussat Naalakkersuisoqarfimmiit tikillugit ataatsimeeqqatigineqartassapput.

Sukumiinerusumik paasissutissanik pissarsiniaraanni, Naalakkersuisup allattaa Helene S. Pedersen på e-mail: hspd@nanoq.gl imlt. tlf. + 299 34 56 11 attavigineqassaaq.