AtuartigukPisortat illuutaasa atortorissaarutaasalu tikikkuminassusaat pillugu inatsisinik qasukkaasoqarniarneraaneq pillugu erseqqissaaneq, takuuk KNR-imi ulloq 17. september ilanngutassiaq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
”Inatsisinik pisortat illuutaannut atortorissaarutinullu tikinneqarsinnaatitsinissamut qulakkeeqataasunik ilaatigut qasukkaasoqarnissaa” Naalakkersuisut siunnersuutigigaat, Naalagaaffiit Peqatigiit inunnut innarluutilinnut ataatsimiititaliaata isornartorsioraa, qulequttap ”Inerniliussineq piareerpoq: Naalagaaffiit Peqatigiit inuit innarluutillit ataatsimiititaliaata inatsit nutaaq isornartorsioraa”, ataani KNR-ip nittartagaani ulloq 17. september atuarneqarsinnaavoq.
Tamanna tunngavigalugu makkuninnga erseqqissaasariaqarluni Ineqarnermut Attaveqaasersuutinullu Naalakkersuisoq Hans Peter Poulsen isumaqarpoq:
”Pisortat illuutaasa atortorissaarutaasalu tikikkuminassusaat pillugu inatsisinik qasukkartitsinissaq Naalakkersuisut siunertarinngilluinnarpaat. Paarlattuanik illuliortiternermut malittarisassani nutaani, assiliartalersuinernik imaqartussani, tikikkuminassuseqartitsinissaq pillugu aalajangersakkat annertusarneqarput erseqqissarneqarlutillu, illuliortunut oqartussanullu piumasaqaatit paasiuminarnerulersinnissaat siunertaalluni.”
Tassunga tunngatillugu erseqqissarneqartariaqarpoq, Illuliortiterneq pillugu Inatsisartut inatsisaanni atuuttumi ilaatigut illuliat innarluutilinnut tikikkuminartunngorlugit aaqqissuunneqartarnissaat siunertaavoq. Tamanna illuliornermut malittarisassani atuuttuni – Illuliornermut malittarisassat 2006 – piumasaqaatitut atuutsinneqarpoq.
Illuliornermut malittarisassat 2006 aalajangersakkanik, illuliat nutaat inunnit innarluutilinnit atorneqarsinnaanissaannik qulakkeerisussanik, imaqarput. Illunut iserfissap portoqatigiissinneqarnissaa, matut silissusaat, pisortat illuutaanni perusuersartarfiit innarluutilinnit atoruminartut, elevatorit inunnit kaassuartakkaniittunit atorneqarsinnaasut, atortulersuutit atuisunit passunneqartussat tamaginnit tikikkuminartuunissaat, innarluutilinnut biilinik inissiisarfiit pillugit piumasaqaatinik kiisalu illuni nalinginnaasumik tikikkuminassuseqartitsinerup pitsanngorsarneqarnissaannut piumasaqaatinik allanik, Illuliornermut malittarisassat ilaatigut imaqarput.
Maannakkorpiaq illuliornermut malittarisassat iluarsaanneqarput. Tassunga atatillugu illuni tikikkuminartunik allagartalersuinissaq paasissutissiisarnissarlu pillugit piumasaqaatit atuutsinneqalissapput. Maannakkut illuliornermut malittarisassani piumasaqaatit atuuttut aalajangiusimaannarneqarput.
Naatsorsuutigineqarpoq illuliornermut malittarisassat nutaat taakkua 2025-mi januaarimiit atuutsinneqalersinnaassasut.
Paasissutissanik annertunerusunik piniarnermi attaveqarfigineqassaaq Ineqarnermut Attaveqaasersuutinullu Naalakkersuisoqarfik uani box909@nanoq.gl