Nunatsinni politikerit: Kalaallit Nunaat unammilligassaqangaatsiartoq

Naalakkersuinikkut Ataqatigiissaarisoqatigiit tassaasut Naalakkersuisut borgmesterillu sapaatip akunnera kingulleq ataatsimiipput, ilaatigut isumaginninnermut, peqqinnissamut, avatangiisinut suliffeqarnermullu tunngasunik eqqartueqatigiillutik.
Nuummi ataatsimiinnerminni qulequttat ilaatigut uku eqqartorneqarput: Sulisussaaleqineq, meeqqat  angerlarsimaffiup avataanut inissinneqartarnerat kommunillu aaqqissugaanerat. 

• Ataatsimiinnerput imartuvoq pingaaruteqarlunilu. Unammilligassat assigiinngitsut eqqartorpagut oqallillutalu, Jess Svane oqarpoq. 

Taanna Naalakkersuisut Ataqatigiissaarisuni siulittaasuuvoq kiisalu aamma Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisuulluni.

• Sammisatta annerit ilaat tassaavoq sulisussaaleqineq. Utoqqaat illuini, ulloq unnuarlu paaqqinnittarfinni meeqqerivinnilu sulisussaaleqineq annertuvoq. Ajoraluartumik piffinni assigiinngitsuni sulisussaaleqisoqarpoq taamaattumillu kommunit arlallit ajoraluartumik avataaniit sulisussarsiortariaqartarput. Aaqqiissutissanik ujaasisariaqarpugut, innuttaasut tamarmik pisariaqartitsinerat qulakkeerumallugu.
• Uagut aamma iliuuseqartariaqarpugut. Tamavitta kivitseqataasariaqarpugut. Sulisut tapersersorlugit iliuuseqarutta siunissami unammilligassat piareersimaffiginerussavagut, Jess Svane oqarpoq.

Naalakkersuisut Ataqatigiissaarisoqatigiit ataatsimiinnerminni isumaqatigiissutigivaat misissuisitsisoqassasoq, ilaatigut paasiniarneqassammat suliffeqarfiit sorliit pisariaqartitsinerpaajunersut.  

Politikkikkut ataqatigiissaarisoqatigiit ukiumut marloriarlutik ataatsimiittarput, ataatsimiinnermilu innuttaasut atugaat inuiaqatigiinnilu unammilligassat eqqartorneqartarlutik.

Sukumiinerusumik paasisaqarusukkuit Naalakkersuisup allattaa Helene Samuelsen Pedersen saaffigiuk, mail: hspd@nanoq.gl, oqarasuaat: 345611.