AtuartigukDicksonip Kangerluani tassaarsuaqarnera pillugu attaveqaqatigiittoqannginnera Naalakkersuisut isumanerluutigaat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Ulloq 16. september 2023 Tunup Avannaani Dicksonip Kangerluani qaqqap sisoornera tassaarsuaqartitsivoq. Tassaarsuaq sumiiffimmi ullut quligiluat ingerlaneranni sakkortoorujussuarmik mallerneranik malitseqarpoq. Qujanartumik tassaarsuaq taamaallaat atortut ajoqusernerannik malitseqarpoq. Tamatuma kingorna pisoq ilisimatusartunit nunanit tamalaaneersunit suleqatigiinnit, atuagassiami Science-mi misissuinerminnik saqqummeeqqammersunit, qulaajaavigineqarpoq.
Dicksonip Kangerluaniit paasisat nutaat Naalakkersuisunut saqqummiunneqanngillat. Tamanna naammaginanngilaq, taamaattumillu siunissami attaveqaqatigiinnerup pitsaanerunissaa siunertaralugu GEUS saaffigineqassaaq.
Pingaartumik pinngortitami ajunaarnersuaqarnera pineqarmat, paasissutissat tamarmik sapinngisamik piaarnerpaamik oqartussanut eqqortunut ingerlatinneqarnissaat, pingaaruteqartorujussuuvoq. Sumiiffinnut qaqqanik sisoortoqarsinnaaneranik annertunerusumik aarlerinartorsiorfiusunut nunap assiliornermik Naalakkersuisut siunnerfilimmik suliaqarput. Taamaattunik navianartunik pisoqarnissarpiaa paasisinnaaniarlugu immaqalu eqqoriarsinnaajumallugu, kangerlunni ulluinnarni angalaarnitsinni aarlerinaataasut taamatut suliaqarnermi annikillisinniarneqarput.
Taamaattumik taskforce-mik, sunniuteqarluartumik upalungaarsimanermik ersarissumillu attaveqaqatigiinnermik qulakkeerisussamik, Naalakkersuisut pilersitsipput, taamaalilluni sumiiffinnik qaqqap sisoorsinnaaneranik aarlerinartorsiorfiunerusunik peqartillugu, innuttaasut sukkasuumik nalunaarfigineqarsinnaassallutik. Tassunga atatillugu najukkani ilisimasat annertoorujussuarmik iluatinnaateqarput. Qaarsunut innanullu qajannartortalinnut attuumassuteqarsinnaasunik takusaqartut, nittartagaq https://govmin.gl/da/fjeldskred/ aqqutigalugu nalunaarutiginninnermut immersugassamik nassiussisarnissamut, kikkut tamarmik kaammattorneqarput.
Ilusiliaq 1. Dicksonip Kangerluanut, sermip ulloq 16. september 2023 tassaarsuaqartitsisup inissisimaffia ilanngullugu, nunap assinga.
Inussiarnersumik inuulluaqqusillunga
Naaja H. Nathanielsen
Inuussutissarsiornermut, Niuernermut, Aatsitassanut, Inatsit Atuutsinneqarnerannut Naligiissitaanermullu Naalakkersuisoq
Kalistat Lund
Nunalerinermut, Imminut Pilersornermut, Nukissiutinut Avatangiisinullu Naalakkersuisoq