Nutartigaq: Iluarsaassinissamut suliniut ’Ataatsimoorluta inissiat peqqissuutitsigit’ aallartippoq

Nutaarsiassaanngilaq ineqarnermut suliassaqarfimmi unammilligassat arlalippassuusut, ungasissumut aalajaatsumillu aaqqiissuteqarfigineqartariaqarlutik. Namminersorlutik Oqartussat inissiarsuaataasa qanoq issusiinik nalilersuinerup ilaatigut takutippaa Namminersorlutik Oqartussat inissiaataat katillugit 2,5 mia. koruunit missaannut aserfallatsaaliorneqarsimanngitsut. 
Aserfallatsaaliuisimannginneq attartortunut annertuumik akornusiisarpoq aammalu inissiat ussiitsuuneranni oqoqarneranillu ilungersunartorsiorfiuneranni takuneqarsinnaalluni. Iliuuseqartoqanngippat, aserfallatsaaliuisimannginneq aningaasartuutissallu tamatumunnga atasut ukiut tamaasa qaffakkiartuinnartussaapput aammalu akiligassaq kinguaassatsinnut ingerlateqqinneqartussaalluni.
Taamaattumik Namminersorlutik Oqartussat inissiaataannik iluarsaassilluni suliniuteqarnissamut pilersaarut – ‘Ataatsimoorluta inissiat peqqissuutitsigit’ – Ineqarnermut Attaveqaasersuutinullu Naalakkersuisup maannakkut aallartissinnaaleramiuk nuannaarutigisorujussuuaa. 

Suliniut ineqarnermik aaqqissuusseqqinnissaq pillugu Naalakkersuisut, IA-p aamma Siumut akornanni politikkikkut isumaqatigiissutaasa immikkoortuinut ilaavoq.

Ineqarnermut Attaveqaasersuutinullu Naalakkersuisoq Hans Peter Poulsen oqarpoq: 
”Namminersorlutik Oqartussat inissiaataannik iluarsaassinissamut ataatsimut pilersaarutip suliarineqarnera sivisuallaamik suliarineqarsimavoq pisariaqartinneqartorujussuullunilu. Taamaattumik iluarsaassinissamut suliniut ’Ataatsimoorluta inissiat peqqissuutitsigit’ saqqummiussinnaagakku iluarisimaarnartorujussuuvoq. Piffissamut ungasissumut naammassineqarsinnaasumillu pilersaarummik, siunissami ungasinnerusumi ineqarnermik oqimaaqatigiissitsiviusinnaasumik, kinguaariinnut tullernut iluaqutaasussamik pilersitsinissaq siunertaraarput.”

Iluarsaassinissamut suliniummi ukiuni 20-ni tulliuttuni Namminersorlutik Oqartussat inissiaataanni iluarsagassat aalajangersarneqarput, taannalu 2025-miit 2044-mut atuuttussaavoq. Iluarsaassilluni suliniuteqarnissamut siunertaavoq maannakkut ineriartornerup mumisinneqarnissaa aammalu aserfallatsaaliuisimannginnerup annertusiartuinnarnerata unitsinneqarnissaa, taamaalilluni attartortut peqqinnartunik ineqarnissaat qulakkeerneqassalluni. Iluarsaassinermi suliniutip najukkani sulisut atorlugit ingerlanneqarnissaa siunertaavoq.

Najugaqarfiit aningaasaqarneranni oqimaaqatigiilersitsinissamik anguniagaqarneq aningaasalersuinnissamut aallaavigineqarpoq, taamaalilluni Namminersorlutik Oqartussat inissiaataannik iluarsaassineq aserfallatsaaliuinerlu siunissami nunap karsianit akilerneqartussaanani. Tamanna pissappat ineqarnermut akiliutit imminnut nammassinnaassapput, ingerlatsinermut aserfallatsaaliuinermut aningaasartuuterpianik matussusiisinnaassallutik. Tamanna pissutigalugu Namminersorlutik Oqartussat inissiaataanni ineqarnermut akiliutinik naleqqussaanermik, ukiut 15-it ingerlanerini ukiumut 3,8%-inik annertussuseqartussamik aallartitsisoqassaaq, 2027-miit, tassalu iluarsaassinerit aallartinneriniit ukiut marluk qaangiunnerini atuutilersussamik. 

Inissiaq ilaqutariit peqqinnissaannut toqqissisimanissaannullu qitiuvoq. Taamaattumik aningaasaqarnerup toqqissisimanartuunissaa ineqarnermullu akiliutinik akiliisinnaassuseqarnissaq ilaqutariit ingerlasinnaanerinut pingaaruteqarpoq. 
Tamanna pissutigalugu ineqarnermut akiliutinik naleqqussaanissap atuutilernissaata tungaanut ineqarnermut tapiissuteqartarneq pioreersoq naleqqussarneqassasoq Naalakkersuisunit siunnersuutigineqarniarpoq. Ineqarnermut tapiissuteqartarnerup naleqqussarneqarnerani ilaqutariinnut aningaasakilliortunut sunniutissat oqinnerulernissaat, aammalu ineqarnerup tapiissuteqartarnerup attartortitsisarnermi akinik aalajangersaasarnermut naleqqunnerulernissaata qulakkeerneqarnissaa siunertarineqarpoq.

Iluarsaassinissamut suliniutissat pillugit annertunerusumik paasisaqarusunnermi Naalakkersuisut nittartagaat innersuussutigineqarpoq. 

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl