AtuartigukNaalakkersuisoq Kommune Kujallermi Aatsitassarsiorfissanik saqqummersitsinermi peqataavoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsenip, Kommune Kujallermi 5. -9. september aatsitassanik nuisitsinerup pilersaarutigineqartup takusarnissaa qilanaaraa.
”Kommune Kujalleq aatsitassarsiorfissanik saqqummersitsinermik suliniuteqarsimavoq, aatsitassanut nunap immikkoortuani tassaniittunut periarfissaqarfiusut ukkatarineqarlutik. Aatsitassarfiorfissanik saqqummersitsinermi nunani tamalaani aatsitassarsiorfiutileqatigiiffiit saqqummersitsinermut qaaqquneqartut, aammalu najukkami inuussutissarsiortorpassuit inuussutissarsiummillu ingerlatsisut akornanni toqqaannartumik ataqatigiissitsissaaq”, oqarpoq Naaja H. Nathanielsen.
Aatsitassarsiorfissanik saqqummersitsinermi illoqarfinni pingasuni tamagiinni pisussanut pilersaaruteqarfiuvoq. Ullup qeqqata siorna najukkami inuussutissarsiummik ingerlataqartut allallu soqutiginnittut aatsitassarsiorfiutileqatigiiffiit pingasut Kalaallit Nunaata kujataani suliassatik pillugit saqqummiinerat, kiisalu Kalaallit Nunaata kallerup inneranik ikummatissiulernissamik (elektro-brændstof, e-fuel) piareersarnera pillugu saqqummiineq, tusarnaarsinnaassavaat. Ullup qeqqata siorna Naalakkersuisumit naggaserneqassaaq.
Ullup qeqqata kingorna suliffeqarfiit assigiinngitsunik suussusillit iluanni najukkami inuussutissarsiummik ingerlataqartut, tamarmik aatsitassarsiorfissamut atatillugu attuumassuteqarsinnaasut, naapeqatiginissaat periarfissaqarpoq.
Naalakkersuisup Kommune Kujalleq najukkami suliniuteqarneranut qutsavigaa, aammalu suliniut tapersersorlugu: ”Aatsitassarsiorfiutileqatigiiffinnit saqqummiinerit tusarnaarnissaat aammalu najukkameersut pikkorissut aqqusaarumaartussat naapinnissaat, qilanaaraakka”.
Saqqummersitsinermi oqalugiartussatut peqataanerup saniatigut, aamma soqutiginnittunik arlalinnik aammalu inuussutissarsiutit allanit, soorlu takornariartitsisarnerup, suliaqartuusut naapinnissaat, Naalakkersuisup pilersaarutigaa.
Illoqarfinni pingasuni, Nanortalimmi 6. september, Qaqortumi 7. september aammalu Narsami 8. september saqqummersitsinissaq tikeraarnissarlu pilersaarutigineqarpoq. Plakatit allagarsiussat alaatsinaakkit.
Attaveqarfissaq: Naalakkersuisoqarfimmi pisortaaneq, Jørgen T. Hammeken-Holm, 34 68 46, joeh@nanoq.gl.