AtuartigukNuna tamakkerlugu innarluutilinnik sullissivik Pissassarfik ineriartortissavarput
Nassiussisuuvoq: Meeqqanut Inuusuttunullu Naalakkersuisoqarfik
Isumasioqatigiinneq ”Nunatsinni inunnik innarluutilinnik tapersersuineq suleqatigiinnerlu – Innuttaasoq pillugu qanoq suleqatigiissaagut?”.
Ulluni makkunani kommunini sulianik suliarinnittartut, innarluutilinnut suliassaqarfimmi aqutsisut, tapersersortinik ataqatigiissaarisartunut aqutsisut, Tilioq, Peqqinnissaqarfik aamma naalakkersuisoqarfiit inuit innarluutillit pillugit suliaqartartut innuttaasut innarluutillit pillugit suleqatigiittarneq siuarsarniarlugu Sisimiuni isumasioqatigiillutik ataatsimoorput.
”Innuttaasut innarluutillit amerlanerit qaammaasaqalersinnaanissaat pitsaanerusumillu piginnaasaqalernissaat anguniarlugu sungiusartalernissaat pitsaanerusumillu inuuneqalernissaat pillugu Pissassarfimmik ineriartortitsinissarput pingaaruteqarpoq,” taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.
Innuttaasut innarluutillit amerlasuut ulluinnarmik namminersornerusumik inuuneqalernissaminnut naammattumik tapersersorneqarneq ajornertik ullumikkut misigisarpaat. Peqatigitillugu sulianik ilisimasallit amerlasuut, Pissassarfiup neqeroorutai, innuttaasut innarluutillit pisariaqartitaannik naammassinnissinnaasut eqqumaffigineq ajorpaat.
Peqqinnissaqarfiup, kommunit Pissassarfiullu akornanni immikkoortut assigiinngitsut suleqatigiinnerannik patajaallisitsinissaq isumasioqatigiinnerup siunertaraa.
Isumasioqatigiinnermi immikkut ukkatarineqarput:
- Innuttaasut sungiusaqqinnissamik, piginnaanngorsaqqinnissamik kiisalu piginnaanngorsaqqinnissamik pisariaqartitsisut.
- Pissassarfiup atuuffia aamma Pissassarfik innuttaasunut – soorlu aamma sulianik ilisimasalinnut qanoq annertunerusumik isumalluutaasinnaanersoq.
- Piffissaq ungasinnerusoq isigalugu anguniagaq: Innuttaasut sungiusaqqinnissaannut, piginnaasamillu sapinngisamik pitsaanerpaamik ineriartortitsinissamut attassiinnarnissamullu ajornaquteqanngitsumik aqqutissaqarnissaat.
Isumasioqatigiinnermi suliat pillugit saqqummiisoqassaaq, workshopeqarluni Pissassarfimmullu takornariartitsisoqassalluni.
Innuttaasut innarluutillit pisariaqartitaat aallaavigalugit isumasioqatigiinneq kommunit, Peqqinnissaqarfiup Pissassarfiullu akornanni suleqatigiinnerulernissaannut siunnersuummik aalajangersimasumik inerneqassaaq, taamaalilluni qaammaasaqarnerulernermut sungiusarnissamullu aqqut naannerulerlunilu ajornannginnerulissammat.
Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.