AtuartigukNattorallit piaraat eqqissisimatitaapput uumasuutigeqqusaanngillat
Nassiussisuuvoq: Aalisarnermut Piniarnermullu Naalakkersuisoqarfik
Piniarneq ukiussamullu pilineq maannakkut suli ingerlavoq. Aasivinniinnermi pinngortitamiinnermilu uumasut nujuartat amerlasuut siumorneqartarput.
Eqqaasissutigineqassaaq nattorallit piarai akornusersorneqarnissaat inerteqqutaammat, taamalu timmissat nujuartanik uumasuuteqarneq inerteqqutaalluni. Tamanna inatsisitigut Timmissanik illersuineq piniarnerlu pillugit Namminersorlutik Oqartussat nalunaarutaat nr. 22, 30. Maj 2022-meersumi § 14 aamma § 23 naapertorlugu.
Timmissat ineqarfii aamma sumiiffiit timmissanik illersuiffiusut saniatigut Kalaallit Nunaat tamakkerlugu timmissat inaat inigineqartulluunniit kiisalu timmissat nujuartat mannii piaraallu allatulluunniit ajoqusernissaat akornusersornissaalluunniit inerteqqutaavoq, soorlu nattorallit piaraat aamma.
Uumasunik nujuartanik ataqqinninnissaq aamma uumasut nujuartat piniakkallu pillugit inatsisinik nalinginnaasumik ataqqinninnissap pingaaruteqassusia Naalakkersuisoqarfiup erseqqissaatigaa.
Sukumiinerusumik paasisaqarusukkaanni immikkoortortaqarfimmi pisortaq Amalie A. Jessen, Aalisarnermut Piniarnermullu Naalakkersuisoqarfik saaffiginnittoqarsinnaavoq, e-mail: amalie@nanoq.gl, tlf. +299 34 53 04