AtuartigukIssittoq pillugu Aallartitaq nunatsinneersuusariaqarpoq
Nassiussisuuvoq: Naalagaaffinngornissamut Nunanullu allanut Naalakkersuisoqarfik
Issittoq pillugu Aallartitaq pillugu suliami Kunngeqarfimmi Danmarkimi, Kalaallit Nunaanni Savalimmiunilu nunat maanna imminnut qaninnerulersimapput. Attaveqartarnermut ataatsimiititaliap ukiumi ataatsimiinnerani aalajangerneqarpoq Issittoq pillugu Aallartitaq kalaaliussasoq, Kalaallit Nunaannit toqqarneqassasoq kiisalu kalaallinit inuiaqatigiinnit tunngaveqassasoq pineqartorlu Senior Arctic Officialimi pisortaassasoq aalajangerneqarpoq. Tassa imaappoq Issittoq pillugu Aallartitaq Senior Arctic Officialsimi, Issittumi Siunnersuisoqatigiinni naalagaaffiit aallartitaattut aqutsisoqatigiiusuni nunanut ilaasortaasunut siulittaasuussaaq. Tamanna piviusumik imaappoq, Kalaallit Nunaata Issittumi Siunnersuisoqatigiinni ulluinnarni siulittaasuuneq Kunngeqarfik sinnerlugu isumagissagaa. Kunngeqarfik Issittumi Siunnersuisoqatigiinni pisortatigoortumik ilaasortaavoq, tamannali Kalaallit Nunaata Issittumi inissisimaneranik tunngaveqarpoq.
”Issittoq pillugu Aallartitamik atorfik pillugu suliami siuariartoqarnera nuannaarutigaara. Kunngeqarfik siulittaasunngorpat Kalaallit Nunaata tungaaniit aallaartitamik toqqaassaagut aallartitarlu Issittumi Siunnersuisoqatigiinni siulittaasutut Kalaallit Nunaanni avataanilu suliaqartassaaq.
Kunngeqarfimmi Kalaallit Nunaat Issittumiippoq Issittumilu atorfiit kalaallinit inummiillu Issittumi piviusumik najugaqartumit isumagineqarnissaasa qulakkeernissaat Naalakkersuisut pingaartilluinnarpaat.
Suliat suleqatigiinnerillu Issittumi Siunnersuisoqatigiinni Issittorlu pillugu aallartitamit suliarineqartut suliassaqarfinnut Kalaallit Nunaanniittunut toqqaannartumik tunngassuteqarput, pisunilu amerlanerpaani kalaallit oqartussaaffigisaanniillutik. Taamaattumik Kalaallit Nunaata Issittumi Siunnersuisoqatigivini aqutsisuunissaa pingaaruteqarluinnarpoq." Naalagaaffinngornissamut Nunanullu Allanut Naalakkersuisoq Vivian Motzfeldt oqarpoq.
Siunissami Issittoq pillugu Aallartitap atorfianut Senior Arctic Officialimilu Siulittaasutut atorfimmut tunngasut inissinniarlugit qaammatini aggersuni isumaqatiginninniutigineqarumaartut naatsorsuutigineqarpoq.
”Aaqqiissutissanut tunngasut, kisiannili pingaarutillit, atorfiit suliallu Issittumi Kalaallit Nunaanni pilersinneqavinnissaannut pingaarutillit pineqarput. Kalaallit Nunaannit Nunanut Allanut – Sillimaniarnermut – Illersornissamullu naalakkersuinikkut periusissiaq naalakkersuinermi Issittoq pillugu Aallartitap aallaavigisassaani qitiussaaq. Aallartitaq oqartussamut sorlermut attaveqaateqassanersoq kiisalu aningaasaqarnikkut tunngavissat pillugit apeqqutit maanna inississavagut.
Kalaallit Nunaata aqutsisuulerneratigut soorunami aningaasaqarnikkut pisussaaffinnik taakkununnga atasunik akisussaaffeqarumaarnera paasisimalluarparput.
Piffissami aggersumi Kalaallit Nunaanni, Savalimmiuni Danmarkimilu atorfilittat suleqatigiissitat akornanni pitsaasumik kinguneqarluartumillu suli oqaloqatigiittoqarnissaa qilanaaraara.” Vivian Motzfeldt nangippoq.
Attavissaq:
Naalakkersuisup allattaa: Naasunnguaq Beck Kristensen
Oqarasuaat: 533684
E-mail: nabk@nanoq.gl