Qaqqat immikkoortuinik alapernaarsuinissamut periusissiaq aamma tassaarsuaqarnissaanut kalerrisaarutinik ineriartortitsineq Uummannami nunaqarfiinilu innuttaasunik ataatsimiititsinermi aallaaviussapput

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund sapaatit akunneranni matumani innuttaasunik ataatsimiititsiniarluni Uummannamut nunaqarfiinullu angalassaaq. Innuttaasut ataatsimiitinneqarnerini sumiiffimmi qaqqat immikkoortui qajannartut pillugit nalunaarusiaq nutaaq aallaaviussaaq.

Tallimanngornermi 30. aggusti aallartitat Naalakkersuisoq Kalistat Lund siuttoralugu Uummannamut eqqaanullu angalassapput. Tassaniinnerminni Ukkusissani, Saattuni, Ikerasanni, Uummannami, Qaarsuni aamma Niaqornani inuttaasut ataatsimeeqatigiinnissamut qaaqqussavaat.

Innuttaasut ataatsimiitinneqarnerini Inuussutissarsiornermut, Niuernermut, Aatsitassanut, Inatsisinik Atortitsinermut Naligiissitaanermullu Naalakkersuisoqarfimmiit geologit Umiammakku Nunaanni aamma Kangerluarsummi qaqqat immikkoortui qajannartut pillugit nalunaarusiaq pillugu ilisimatitsissapput. Aamma geologit nalunaarusiamiit qaqqanit sisoortoqarsinnaaneranut ilusilikkat tassaarsuaqarneranilu qarsutsisinnaanermut nunap assingi pillugit ilisimatitsissapput.

Naalakkersuisoq Kalistat Lund suleqatigiit qitiusut, qaqqat immikkoortuinik alapernaarsuinissamut periusissiap atulersinneqarnissaannik suliaqartut pilersinneqarnerat pillugu ilisimatitsissaaq. Aamma Naalakkersuisup sumiiffimmi tassaarsuaqarnissaanut kalerrisaarutinik ineriartortinneqarneri oqaluttuarissavaa.

Innuttaasut ataatsimiitinneqarnissaannut pilersaarut piffissanullu pilersaarutit
Ulluni piffissanilu ukunani Ukkusissani, Saattuni, Ikerasammi, Uummannami, Qaarsuni Niaqornanilu innuttaasut ataatsimiitinneqassapput:

Ukkusissat:
arfininngorneq 31. aggusti 2024 nal. 14:00.

Saattut:
arfininngorneq 31. aggusti nal. 18:00.

Ikerasak:
sapaat 1. septembari nal. 14:00.

Uummannaq:
sapaat 1. septembari nal. 19:00.

Qaarsut:
ataasinngorneq 2. septembari nal. 14:00.

Niaqornat:
ataasinngorneq 2. septembari nal. 17:00.


Attaveqarfissaq
Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu aamma/imaluunniit naalakkersuisup allattaa Jeanette L. Petersen tlf: +299 26 54 76-imut imaluunniit e-mail: jalp@nanoq.gl aqqutigalugu attaveqarfigineqarsinnaapput.