Piorsarsimassutsitigut pingaartitat innuttaasunik ataatsimiisitsinerni soquqitineqarnerat Vivian Motzfeldtimit maluginiarneqartoq

Inatsit Tunngaviusussaq pillugu innuttaasunik Nuummi, Qaqortumi, Narsami Nanortalimmilu ataatsimiisitsinerni innuttaasut oqariartuuteqarusulluarput, pingaartumillu piorsarsimassutsikkut pingaartitat innuttaasunit soqutigineqarluarput.

- Inuiattut qanoq pingaartitaqarnerput innuttaasuni oqallisigineqarluarpoq, tamannalu tamatsinnut pissarsiaqarnaqaaq. Inatsit Tunngaviusussaq pillugu Isumalioqatigiissitat isumaliutissiissutaanni aallaqqaasiummi oqariartuut eqqaassanngikkaanni ilaatigut piorsarsimassutsitsinnut tunngasut isumaliutissiissummi ilanngunneqanngillat. Taamaattumik innuttaasut piorsarsimassutsitsinni pingaartitatsinnik soqutiginninnerat soqutiginarpoq. Tammannalu ingerlaannassanersoq eqqumaffigissavarput, Vivian Motzfeldt Naalagaaffinngornissamut Nunanullu allanut Naalakkersuisoq oqarpoq.

Taasititsinerit tikkuussisinnaapput

Innuttaasut ataatsimiinnerni apeqqutit assigiinngitsut aallaavigalugit najukkani isumasiuilluni taasititsinerni annikitsuni periarfissinneqarnissaat Naalakkersuisup nammineq pingaartissimavaa. Oqarasuaatit angallattakkat aamma pappiaqqat atorlugit taasisinnaaneq innuttaasunut periarfissiissutigineqarput.

- Innuttaasut inatsisissamik piginnittuunissaat qulakkeerniarlugu qinikkaminnut oqariartuutissaminnik apuussinissaannut nittartakkatigut taasitinneqarnerat sumut ingerlariaqqinnissatsinnut tikkuussisinnaavoq. Maannamullu takusinnaalereerparput innuttaasut isumaat assigiiffeqartorujussuusut. Taamaattorli taasititsinerit innuttaassuseqarneq aallaavigalugit atorneqarsinnaanngikkallarnerat eqqumaffigissavarput, taamaakkaluartorli soqutiginarpoq, Vivian Motzfeldt isumaqarpoq.

Oqariartuuteqarusulluarput

Inatsit Tunngaviusussaq pillugu ataatsimiisitsinerni illoqarfinni sisamani innuttaasut katillugit 100-t sinnilaarlugit peqataapput, naallu amerlagisassaanngikkaluartut ataatsimiisitsinerni peqataasut oqariartuuteqarusussuseqarluarput.

- Innuttaasut eqimattakkaarlutik oqallitsinneqarneranni eqeersimaarlutik peqataarusussuseqarluarput, peqataatinneqarnerminnilu akisussaaffimmik annertuumik takutitsipput. Ataatsimiinnerit aatsaat aallartinneranni takusinnaalerparput ornigulluta innuttaasut tikillugit oqariartuutaat tusaassallugit qanoq pingaaruteqartigisoq, ilinniartullu ataatsimiinnerni taamaattuni peqataasariaqarnerat aamma uppernarsivarput, Vivian Motzfeldt naliliivoq.

Innuttaasunik illoqarfinni sisamani ataatsimiisitsinerit misiligutaanissaat aammalu ataatsimiisitsisarnerit atortorineqartullu kingornatigut naleqqussarneqarlutillu tulluarsarneqarumaartut siusinnerusukkut oqariartuutigineqareerpoq. Innuttaasunit isornartorsiuinerit siunnersuuteqarnerillu tusaaniarneqassapput.

- Innuttaasunik ataatsimiisitseqqinnissatsinni amerlanerpaat peqataassappata attaveqaatit amerlanerusut atorneqarnissaat siunniupparput. Angalaqqinnissatsinnullu qilanaalereerpugut. Ataatsimeeqataasussani arlaannaalluunnniit pingaarnerunanilu pingaannginnerunngilaq, taamatuttaaq Inatsit Tunngaviusussamut isumaqataanngitsut tamarmik aamma tikilluaqqussaaput, erseqqissaatigissavaralu naalagaaffinngornissamut aamma Inatsit Tunngaviusussaq pillugu akerliusut ataatsimiinnerni allatuulli tikilluaqqusaammata. Sammineqartut sapinngisamik tusaaniarluta aaqqiissuteqarusussuseqarlutalu sammissavagut, taamalu innuttaasut, isummersuutit assigiinngisitaarnerillu ataqqineqassallutik, Vivian Motzfeldt Naalagaaffinngornissamut Nunanullu allanut Naalakkersuisoq oqarpoq.

Annertunerusumik paasisaqarusuttuni Naalakkersuisup allattaa Naasunnguaq Beck Kristensen attavigineqarsinnaavoq, oqarasuaat 34 56 82.


Nuummi, Qaqortumi, Narsami Nanortalimmilu isumasiuilluni taasititsinerit inerneri kakkiulugit ilanngunneqarput.