Peqqissutsimut Naalakkersuisoq Agathe Fontain Nunat Avannarliit Killiit Peqqissutsimut Naalakkersuisuinik ataatsimiititsivoq

Peqqissutsikkut sullissisunik sulisussarsiorneq aamma sulisoriinnarneqarnissaat ukioq manna Nunat Avannarliit Killiit Peqqissutsimut Naalakkersuisuisa ataatsimiinneranni pingaarnertut qulequtarineqarpoq, tassani Islandimi, Savalimmiuni aamma Kalaallit Nunaanni peqqissutsimut naalakkersuisut peqataapput. Ataatsimiinnermi soqutiginartunik saqqummiisoqarpoq aamma nunani avannarlerni killerni peqqinnissaqarfiit assigiinngitsut, nakorsaatit, WHO-mik suleqateqarneq aamma siunissami ataatsimut suleqatigiissuteqarfigineqarsinnaasut pillugit oqallittoqarpoq.

Nunat Avannarliit Killiit peqqissutsimut naalakkersuisuisa akornanni ataatsimiinneq siulleq Nuummi 2012-mi pivoq, suleqatigiinnerlu 2014-imi suleqatigiinnissamut isumaqatigiissummik nassuiaaserneqarluni 2014 atsiorneqarpoq.

Nunat Avannarliit Killiit peqqissutsimut tunngatillugu suleqatigiinnerisa nukittorsarneqarnissaa pisariaqartoq peqqissutsimut naalakkersuisut isumaqatigiissutigaat, taamaattumillu suleqatigiinnissamut isumaqatigiissut nutarterlugu.

"Nunavut assigiinngikkaluartut aamma arlaatigut assigiissuteqarput. Inuiaqatigiit amerlanngilagut innuttaasut tunngaviusut amerlanatik. Peqqissutsimut naalakkersuisut ataatsimiinneranni peqqinnissaqarfiup iluani misilittakkavut naleqarluartut aamma ataatsimut ilungersuussassatsinnut aaqqiissutissat pillugit avitseqatigiippugut. Tamatuma peqatigisaanik ataatsimiinneq aamma peqqissutsimut tunngatillugu nunani avannarlerni killerni sanilitta suleqatiginerisa ineriartortinnissaannut nukittorsarnissaannullu periarfissaq pingaaruteqarsimavoq”, Peqqissutsimut Naalakkersuisoq, Agathe Fontain oqarpoq.

"Nunani Avannarlerni Killerniittugut unammilligassavut assigiippassuupput. Misilittakkavut annertuumik ilikkagaqarfigisinnaavagut, namminerlu unammilligassatsinnik aaqqiissuteqarnissamut isumassarsiorfigisinnaalluta. Nuummi ataatsimiinnitsinni peqqinnissaqarfimmut tunngasunik suleqatigiinnerput pitsaasooreersoq nukittorsaqqissallugu isumaqatigiissutigigatsigu nuannaarutigaara, Nunani Avannarlerni Killerni tamatsinnut pingaaruteqarnera pissutigalugu", Savalimmiuni Peqqissutsimut Naalakkersuisoq, Margit Stórá oqarpoq.

"Nunat Avannarliit Killiit Suleqatigiinneranni ataatsimiinneq ataqatigiinnerup qaqeqqinneqarnissaanut pingaaruteqarluinnarpoq, inuiaqatigiinnimi amerlanngitsuni aamma nunat sumiiffiinut tunngatillugu unammilligassagut amerlasuut assigiimmata. Aaqqiissuteqarfiginissaannut periusissarpassuit avitseqatigiissutiginissaat aamma ataatsimoortinnissaat pingaaruteqarpoq. Ataatsimiinnermi nunat avannarliit killiit suleqatigiinnerat aamma nunanit mikisunit suliniutit qanoq naleqartiginerat malugaarput, aammalu suleqatigiinnerup matuma nassuiarneqarnissaa qanoq pingaartiginersoq", Islandimi Peqqissutsimut Naalakkersuisoq, Willum Þór Þórsson oqarpoq.

Nunat Avannarliit Killiit Peqqissutsimut Naalakkersuisuisa ataatsimiinnerat Nuummi ulluni 25.-26. august 2024 pivoq, Peqqissutsimut Naalakkersuisoq Agathe Fontain qaaqqusisoralugu. Peqqissutsimut Naalakkersuisut 2025-mi ataatsimiinnissaannut Island qaaqqusisuussaaq.

Paasisaqarnerorusukkuit naalakkersuisup allattaa Birgithe Heinrich e-mailikkut: bihe@nanoq.gl imaluunniit oqarasuaatikkut ugguuna attaveqarfigineqarsinnaavoq: +299 34 66 17