Ataatsimoorluta kokain aamma ikiaroornartoq akiortigit!

Aningaasaqarnermut Akileraartarnermullu Naalakkersuisup Danmarkimi Akileraartarnermut Ministeri, Jeppe Bruus, nunatsinni 18. aggustimit 21. aggustimut ikiaroornartunik anngiortumik eqqussuinermik peqquserluuteqarnermiillu aningaasaqarnermik akiuinermi suleqatigiinnerulernissaq pillugu siunertamik nalunaarut atsiorniarlugu ataatsimeeqatigissavaa. Tikeraarnermi nunatta Danmarkillu akornanni oqartussat nunatsinni ilungersunartut iliuuseqarfiginissaannut alloriarneq pingaaruteqartumik malunnartitsivoq.

Ikiaroornartunik anngiortumik eqqussuineq akiorniarlugu ataatsimut suliniuteqarneq
Kalaallit Nunaanni ikiaroornartunik, pingaartumik kokainimik aamma hashimik, Danmarkimi aqqutigalugu assartorneqarajuttartumik anngiortunik eqqussuineq ukiuni kingullerni annertusiartortumik ajornartorsiutigaa. Ikiaroornartut inerteqqutaasut Kalaallit Nunaanni inuiaqatigiinni inuttut atukkatigut peqqissutsikkullu annertuumik ajornartorsiortitsilersarput. Ikiaroornartunik tuniniaaneq aamma pinerluuteqartarnermik annertusiartortitseqataavoq, tamassumanilu innuttaasut nalinginnaasut inatsisinik eqqortitsisartut toqqissisimajunnaartitsiartorluni.

”Ikiaroornartut inuit inuunerat aserortarpaat inuiaqatigiillu ajoqusertarlugit. Soorunami ikiaroornartumik anngiortumik eqqussuinermut tuniniaasarnermullu atasumik aamma pinerluuteqarnermit aningaasaqarfiupput. Tamanna akuerineqarsinnaanngilaq, pinerluttullu soqutigittaatsut ikiaroornartunik nunatsinnut eqqussuiniarsarisut qanorluunniit iliorluta unitsissavagut. Taamaammat ajortumik ineriartorneq unitsinniarlugu Kalaallit Nunaata Danmarkillu akornanni maannakkut suleqatigiinnerulersoqarpoq”, akileraartarnermut ministeri Jeppe Bruus oqarpoq.

Naalakkersuisut taamatut ineriartorneq piffissami sivisuumi ernumassutiginikuuat, nunatsinnullu unioqqutitsilluni ikiaroornartunik eqqussuineq unitsinniarlugu Danmarkimik suleqatigiinnerulernissaq pisariaqartutut isigalugu.

“Nunatsinni inuusuttortagut siunissami periarfissaqarput ikiaroornartunillu soorlu kokainimik aamma hashimik il.il. sunnerneqaratik pitsaasumik toqqissisimanartumillu siunissaqalernissamut periarfissaqassapput. Pinerluttut aamma rockerit aningaasanik iluanaarniarlutik ikiaroornartunik anngiortumik eqqussuinerminni inuusuttut navianartumiittut atorluarniarsarigaat ajoraluartumik takusarparput. Tamanna akuerineqarsinnaanngilaq, aammalu qanorluunniit iliorluta taamatut pinerluuteqartarneq unitsinniassavarput. Danmarkimi oqartussanik suleqateqarnerulerneq taamatut suliniuteqarnitsinni alloriarneq pingaartuuvoq.” Aningaasaqarnermut Akileraartarnermullu Naalakkersuisoq oqarpoq.

Peqquserluuteqarluni aningaasaqarnermi akiuinermi suliniutit nutaat
Suleqatigiinnermi akileraaruteqarnani sulisarnermik aningaasatigullu pinerluuteqartarnermik ikiaroornartumik tuniniaanerup ilagigajuttagaanik ataatsimut suliniuteqarneq aamma ilaavoq. Nunatsinni Danmarkimilu akileraartarnermi oqartussat piffissami sivisuumi pitsaasumik qanimullu suleqatigiittarnikuupput, suliniutilli nutaat maannakkut aallartinneqartut taamatut suliniuteqarneq annertusiteqqissavaat.

Erik Jensen tassunga atatillugu oqarpoq: “Ikiaroornartunik anngiortumik eqqussuinermik anngiortumillu aningaasaqarnermik akiuineq Kalaallit Danmarkimi Akileraartarnermut Ministereqarfimmik nunatta siunissaanut pingaaruteqarpoq, Danmarkilu qanimut ataqatigiissaareqatigalugu immikkoortuni taakkunani sulinitta annertusineqarnissaat qilanaaraarput.”

Marloqiusamik akileraartarneq pillugu isumaqatigiissummut ilassutitut isumaqatigiissut
Tikeraarnermi nunaata Danmarkillu akornanni marloqiusamik akileraartarneq pillugu isumaqatigiissummut ilassutitut isumaqatigiissut aamma atsiorneqassaaq. Isumaqatigiissut illuatungeriit nunat tamat akornanni pisussaaffimminnik eqqortitsinissaasa qulakkeernissaanut alloriarneq pingaartuuvoq, tassunga ilanngullugu minnerpaamik pisaassutitut BEPS-itut taaneqartartut akileraartarnermi peqquserluuteqartarnerup pinngitsoortinneqarnissaanut naapertuilluartumillu akileraartitsisarput qulakkeernissaanut pingaaruteqartut.

Naalakkersuisut ikiaroornartumik pinerluuteqartarnermik anngiortumillu aningaasaqarnermik akiuinermi Danmarkimik suleqateqarnerup ingerlateqqinnissaa qilaanaaraat.

Sukumiinerusumik paasissutissat pillugit Naalakkersuisup allattaa Nukaaka Tobiassen emailikkut nukat@nanoq.gl imaluunniit +299 34 55 17-inikkut attavigineqarsinnaavoq.