Peqqinnissakkut ilisimatusarnermi Ilisimatusarnermi Ileqqorissaarnissamut Ataatsimiititaliamut ilaasortanik sisamanik Naalakkersuisut toqqaapput

Peqqinnissaqarfimmut tunngasunik ilisimatusarnermi pitsaasumik suleriaaseqarnissap qulakkeernissaa ataatsimiititaliap siunertaraa. Nunatsinni Ilisimatusarnermik Siunnersuisoqatigiit innersuussuteqarnerisa kingorna Naalakkersuisut peqqinnissaq pillugu ilisimatusarnermi ileqqorissaarnissamut ataatsimiititaliamut ilaasortanik sisamanik toqqaapput. Ataatsimiititaliaq peqqissutsimut tunngasunik sulialinnik marlunnik aamma inuinnartut ilaasortanik marlunnik inuttaqarpoq.

Ilaasortat:

• Gert Mulvad, MD, dr. h.c., Dronning Ingridip Napparsimmavissuani nunap immikkoortuani nakorsaq; Ilisimatusarfimmi ataqqinaammik doktoriusoq, Kalaallit Nunaanni Peqqissusermik Ilisimatusarfik - peqqissutsimut tunngasunik sulialittut ilaasortaq (toqqagaaqqittoq).
• Karsten Rex, ph.d., Dronning Ingridip Napparsimmavissuani nakorsaq immikkoortortaqarfimmi pisortaq; Kalaallit Nunaanni Peqqissusermik Ilisimatusarfik ilisimatusartutut attuumassuteqartoq - peqqissutsimut tunngasunik sulialittut ilaasortaq (toqqagaaqqittoq).
• Sara Olsvig, cand.scient.anth., Inuit Circumpolar Councilimi nunani tamalaani siulittaasoq - inuinnartut ilaasortaq
• Mitdlarak Lennert, cand.scient.soc. Issittumi ilisimatusarnermi Ph.D., namminersortoq - inuinnartut ilaasortaq.

Ilisimatusarnermi Ileqqorissaarnissamut Ataatsimiititaliap nappaatit pinngortarnerannik aamma peqqissutsimut tunngasunik ilisimatusarnikkut Kalaallit Nunaat tamakkerlugu suliniutinut ileqqorissaarneq pillugu akuersissutinut qinnuteqaatit suliarisarpai. Suliniutit ilisimatusarnermi ileqqorissaarnikkut illersorneqarsinnaasumik naammassineqarnissaasa qulakkeernissaat ataatsimiititaliap siunertaraa.

Peqqissutsimut tunngasunik ilisimatusarneq ileqqorissaarnermut attuumassutilinnut nalorninartorpassuaqartarpoq aamma illuatungeriinnut peqataasunut eqqarsaatiginnilluni oqimaaqatigiissaarisoqartarluni. Ilisimatusarnermi ileqqorissaarnissamut naliliinerit inuit misissuiffigineqartut pisinnaatitaaffiisa, isumannaatsuunissaasa, ilorrisimaarnerisa, ilisimatusarnikkut suliniummut tunngatillugu navianartuusinnaasut, aamma inuiaqatigiit ilisimatusarnikkut tunngavilimmik nutaamik suliaqarnissamik pisariaqartitsinerat pisariaqanngitsumik killilersorneqannginnissaata akornanni oqimaaqatigiissitsinermik pilersitsinermik imaqartarput..

”Ilisimatusarnermi ileqqorissaarnissamut ataatsimiititaliamut innersuunneqartut sisamat naleqqulluinnartut ilaasortaanissamik kissaateqarnerat nuannaarutigaara. Ataatsimiititaliamut toqqarneqaqqammersut ilisimatusarnissamut qinnuteqaatit nalilersornissaannik isumaginninnissamut suliatigut pisariaqartunik piginnaasaqarput. Tamatuma peqatigisaanik innersuunneqartut ilaatigut ilisimatusarnermi ileqqorissaarnermut, inuiaqatigiinni pissutsinut, kulturerput oqaatsivullu pillugit ilisimasaqarluarput. Ataatsimiititaliap sulinerminik aallartitsinissaa qilanaaraara, sulilluarnissaannillu kissaappakka”, Peqqissutsimut Naalakkersuisoq Agathe Fontain oqarpoq.

Ataatsimiititaliaq ilisimatusarnikkut suliniutinut ileqqorissaarnermut tunngatillugu akuerisaanissamut qinnuteqaatinik ukiumut 25-t missaanniittunik tigusaqartarpoq. Ataatsimiititaliap allattoqarfia Nunatsinni Nakorsaaneqarfimmi inissisimavoq. Ataatsimiititaliap aalajangiineri aamma ilisimatusarneq pillugu allagaq pilersaarutit aalajangersarneqarsimasut naapertorlugit aallartinneqarnersut, Nakorsaanerup misissortarpai.

Paasissutissat sukumiinerusut: Peqqinnissakkut ilisimatusarnermi Ilisimatusarnermi Ileqqorissaarnissamut Ataatsimiititaliami siulittaasoq, Gert Mulvad, e-mail: gm@peqqik.gl, tlf. 483253.