AtuartigukNuummi timmisartoqarfimmi isumannaallisaanerup akuerineqarsimannginnera pillugu tusagassiuutitigut nalunaarut
Nassiussisuuvoq: Ineqarnermut Attaveqaasersuutinuullu NaalakkersuisoqarfikIsumannaallisaanermut akuersissuteqarnerup Angallannermut Aqutsisoqarfimmiit atorunnaarsinneqarsimanera pissutigalugu, Nuummiit nunanut tamalaanut timmisartuussinerit unitsikkallarneqarsimasut, ippassaq nutaarsiassani takuneqarsinnaavoq.
Angallannermut Aqutsisoqarfiup nakkutilliilluni takusaanerata nalaani isumannaallisaanerup annertussusaani kukkunernik amigaataasunillu nassaartoqarsimasoq, Greenland Airports A/S paasissutissiivoq. Tassungarpiaq tunngatillugu tassani pineqarput matut paarnaarneqanngitsut, tamaalillunilu sumiiffinnut iserfigineqaqqusaanngittunut akuerineqarani isernissaq periarfissaqarluni, tamannalu Nuummiit nunanut tamalaanut timmisartuussinerit atorunnaarsikkallarneqarnerannik tamanna kinguneqarluni.
Naalakkersuisoq Hans Peter Poulsen oqarpoq:
”Ajuusaarnartorujussuartut isigaara unammillernartut angalasunut timmisartoqarfiullu sullitaannut kalluaasut maannakkut atuunnerat oqaatigisariaqaratsigu.
Imarpik qulaallugu timmisartunut timmisartoqarfimmik terminalitaqartumik nutaamik sanaartorneq unammillernanngitsuunngilaq. Tamanna nunatsinni suliassat aningaasaliinerillu annersaraat, aallartisarnerata nalaani aallarteqqaarnermi ajoqutinik malitseqarluni. Kingusinaarluni isumatuniarsarinissaq ajornaatsuuvoq, kisianni tamanna maannakkut pisunik aaqqiissuteqarnissamut iluaqutaanngilaq.
Taamaattumik Greenland Airports A/S kiisalu timmisartuutileqatigiiffiit, taakkualu sulisui, nangaassuteqarnanga tatigigakkit erseqqissassallugu uannut pingaaruteqarpoq. Taakkua sulisuisa unammilligassat tamarmik, piaarnerpaamik, ingerlaavartumik aammalu pineqartunut tamaginnut annikinnerpaamik akornusiisumik aaqqiiviginissaat qulakkeerniarlugu annertoorujussuarmik suliniuteqarput, taamaalilluni angalaneq nuannersumik misigisaqarfiusinnaassalluni.”
Paasissutissanik annertunerusunik piniarnermi attaveqarfigineqassaaq Ineqarnermut Attaveqaasersuutinullu Naalakkersuisoqarfik uunga box909@nanoq.gl