AtuartigukNukissiorfimmi pisortaq tunualerpoq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Cicilie Senderovitz 30. september 2024 atuutilersumik Nukissiorfinni pisortatut tunuarpoq. Tamanna illuatungeriit isumaqatigiissuteqarnerisigut pivoq.
Cicilie 1. maj 2022 aallarnerfigalugu Nukissiorfinni pisortatut atorfeqarsimavoq.
Taanna Nukissiorfiit aaqqissuussaanertut nutaamik eqqarsaateqarfiginissaanut ajunngivissumik suliniuteqarpoq. Pisortatut aaqqissuussaanermi teknikkinut tunngasut pulaffigilluarsimavai aammalu periusissiat sammilluarsimallugit.
Sulisut akornanni atugarissaarnerulersitsisinnaasimavoq, peqatigisaanillu aningaasaleeqqinnissanut pisariaqartunut politikkikkut eqqumaffiginnilersitsisimalluni.
Tamaasa isigalugit aaqqissuussaaneq pitsanngorsarneqartoq nutarterneqarluartorlu qimattussanngorpai.
“Naalakkersuisut aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik sinnerlugit Cicilie Nukissiorfinni kusanartumik suliniuteqarsimaneranut qutsavigaara. Cicilie suleqatigilluartorujussuusimavarput, tamatumani tatigeqatigiinneq malunnarsimalluni aammalu pisortat pilersuinerisa qulakkeernissaasa nukittorsarnissaatalu iluatsilluarnissaa ataatsimoorluni kissaatigineqarsimalluni. Peqatigisaanik Cicilie siunissami iluatsitsilluarnissaannik kissaappara, neriuutigaaralu Nukissiorfinni pisortanngortussap sammiveqarluartumik ingerlatsineq Ciciliep ingerlassimasaa, ingerlateqqissagaa” oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup maannakkut Nukissiorfiit nutaamik pisortassarsiorneqarnissaanut suliap ingerlanera aallartippaa.
Sukumiinerusumik paasisaqarnerorusukkuit Naalakkersuisup allattaa Manasse Berthelsen oqarasuaammut.: 34 56 03/54 88 68 imaluunniit e-mailimut: pan@nanoq.gl attavigisinnaavat.