Tapiissutinik annertusiinikkut imminut pilersornissamut susassaqarfik aamma nuna tamakkerlugu imminut pilersornerup annertusinissaa siuarsarneqassapput

Tunisassiorfimmut tapiissutit annertusineqassasut Naalakkersuisut aalajangerput. Tapiissutit kikkunnit tamanit, imminut pilersornermik sulialinnit pissarsiarineqarsinnaanissaannik qulakkeerinninnissaq - tapiissutit aamma imminut pilersorsinnaanermut periusissiassap akornanni sunneeqatigiittoqassasoq tapiissutinik qaffaanermi siunertarineqarput. Kikkulluunniit suliniutillit nunami imminut pilersorsinnaanerup annertussusianik annerulersitsiserusuttut 1. august 2024-p tungaanut tapiissutinik qinnuteqarsinnaapput.

Nunami namminneq pilersorsinnaanermut periusissiamik siullermik suliaqarnissamik Naalakkersuisut aallartitsipput. Imminut pilersorsinnaanermut periusissiami - suliniutit nutaat aqqutigalugit - 2030 nallertinnagu nunatsinni imminut pilersornerup annertussusaanik annerulersitsinissamik piviusunngortitsinissaq siunertarineqarpoq.
Tamatuma saniatigut tunisassiornerup, saqqumilaarnerup annerulersinnerisigut aamma kalaallit nerisassaataasa pissarsiarineqarsinnaanerulersinnerisigut innuttaasut inuussutissanik isumannaatsunik pilersornerat annertusineqassaaq.

Inuussutissarsiuteqartut amerlanerusut imminut pilersornermut suliassaqarfimmi ineriartortitsinermi taperneqarnissamut periarfissaqassapput
Ukioq manna – aamma ukiuni tulliuttuni – inuussutissarsiuteqartut amerlanerusut nuna tamakkerlugu imminut pilersornermut suliassaqarfimmi ineriartornermut siuariartornermullu tapersiinissamut periarfissaqalissasut imminut pilersorsinnaanermut periusissiamik aallartitsinissaq sioqqullugu Naalakkersuisut aalajangerput. Taamaalilluta tunisassiornerup saqqumilaarnerullu annerulersinnerisigut aamma najukkami nerisassat pissarsiarineqarsinnaanerulersinnerisigut kalaallit imminut pilersornerisa annertussusaanik annerulersitsitsisinnaassagatta. Najukkami nerisassanik tunisassiornermut tunngatillugu qangatut aamma nutaaliornikkut imminut pilersornermi pineqarput. Periarfissat pitsaanerusut qulakkeerumallugit aningaasanut inatsit 73.04.08 allanngortinneqarpoq aamma siunertanut nassuiaatit annertusineqarput. Iluamik oqaatigissagaanni aningaasanut inatsimmi kontup taaguutaa allanngortinneqarpoq, taamaalilluni ”Kalaallit Nunaanni imminut pilersornermik ineriartortitsineq”-mik taaguuteqalerpoq, aamma imminut pilersornerup iluani tunisassiortut tamarmik, sumiiffik apeqqutaatinnagu, tapiissutinik maanna qinnuteqarsinnaanngornerat ammaanneqarpoq.

”Imminut pilersornermut susassaqarfik Naalakkersuisunit tapersersorusupparput aamma nukittorsarusupparput. Tapiissuteqartarnermik aaqqissuussineq iluaqutigalugu siusinnerusukkut inoqarfinni minnerusuni isorliunerusunilu tunisassiorfinnik siuarsaasoqarsimavoq, kisiannili nutaamik eqqarsarpugut tapiissuteqartarnermillu aaqqissuussineq allanngortillugu, taamaalilluni siunissami kalaallit imminut pilersornerisa annertussusaanik annerulersitsinissarput annerusumik qitiutissavarput. Taamaaliorsimavugut, tassami imminut pilersornissamik piujuartitsinermillu siuarsaanissaq Naalakkersuisunit kissaatigigatsigu. Nuna tamakkerlugu tunisassiortut imminut pilersornerup ineriartorneranut taperseeqqullugit aamma nuna tamakkerlugu pitsaasumik allannguutit aallartinneqarsimasut tapersersueqqullugit kajumissaarusuppavut, taama oqarpoq Nunalerinermut, Imminut Pilersornermut, Nukissiutsinut Avatangiisinullu Naalakkersuisoq Kalistat Lund, nangillunilu:

”1. august 2024 nallertinnagu nunami imminut pilersornerup annertussusaanik annerulersitserusuttunit tunisassortunit isumassarsinartunit, taperseereersunit – imaluunniit taperseerusuttunit, qinnuteqaaterpassuarnik tigusaqassallunga neriungaarpunga. Taamatuttaaq imminut pilersornerup iluani nutaaliornermut aallarnisaanermullu tunngatillugu nukittuunik avatangiisinik pilersitsinissamut tapertaassasoq neriuppunga”, taama Kalistat Lund naggasiivoq.

Imatut ”Imminut pilersornerup ineriartortinnissaanut tapiissutinik” qinnuteqarsinnaavutit
2,3 mio.kr.-t tapiissutitut aningaasaliissutissanut immikkoortinneqarput.
Qinnuteqartup suliniutinut tunngatillugu neqeroorutinik pissarsisimaneq uppernarsarsinnaappagu aningaasat qinnutigineqarsinnaasut killilerneqarsimanngillat. Tamatuma saniatigut aningaasatigut matussuserneqartussanut atatillugu qinnuteqartup suliniut immikkut ittoq qinnuteqarfigissagaa piumasaqaataavoq. Suliniutit tapiissuteqarnermik aaqqissuussinermi pineqartut (ingerlatsinermut aningaasartuutit matussuserneqarneq ajorput) assersuutigalugu tassaapput:

- maskiinanik nutaanik pisineq,
- sulisut ilinniarnerisa ingerlarngi,
- tunisassiornermi atortunik iluarsartuussineq

”Imminut pilersornerup ineriartortinnissaanut” qinnuteqarnissamut killigitinneqartoq
Ukiumut marloriarluni qinnuteqartitsisoqartarpoq. Imminut pilersornermik ineriartortitsinissamut tapiissutinik qinnuteqarnissamut killigitinneqartut uku atuupput:

• 1. august 2024 kiisalu
• 1. oktober, qinnuteqartitsinerup siulliup naammassinerata kingorna aningaasat sinneqarsimappata.

Linki una atorlugu ”Imminut pilersornerup ineriartortinnissaanut tapiissutinik” qinnuteqartoqarsinnaavoq. Aammattaaq tassani tapiissuteqartarnermik aaqqissuussineq, piumasaqaatit, suliamut ingerlatseriaaseq il.il. pillugit paasisaqarnerusinnaavutit.

Sukumiinerusumik paasisaqarnerorusukkuit Naalakkersuisup allattaa Manasse Berthelsen oqarasuaammut.: 34 56 03/54 88 68 imaluunniit e-mailimut: pan@nanoq.gl attavigisinnaavat.