Kujataani kultisiorfiup ammaqqinnissaa maanna qanilliallappoq

Nalunami kultisiornissamik pilersaarutip avatangiisinut sunniutigisinnaasaanik nalilersuineq (ASN) aamma Inuiaqatigiinni piujuartussamik iluaqutaasumik sunniutissanik naliliineq (IPISN), Naalakkersuisut 2024-mi sisamanngornermi juunip 27-ani akuersissutigaat.

Naaja H. Nathanielsen, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq ima oqarpoq:
"Kujataani inuussutissarsiutitigut ineriartortitsinermi pingaarutilimmik killiffik anguneqarpoq. Piiaanissamut, matusinissamullu pilersaarutissaq kiisalu suleqatigiinnissamik isumaqatigiissutissap isumaqatiginninniutigineqarnissaa suliassaalerput. Taakkununngali sinaakkutissaq, ASN-imik aamma IPISN-imik akuersissuteqarnikkut maanna inissippoq. Kommuni qanimut suleqatigalugu oqaloqatigiinnerup ingerlateqqinnissaa qilanaaraara.”

Kalistat Lund, Nunalerinermut, Imminut Pilersornermut, Nukissiutinut Avatangiisinullu Naalakkersuisoq ima oqarpoq:
“Nalunami kultisiornissamik pilersaarummut ASN-imik aamma IPISN-imik akuersissuteqarnikkut, Kujataa pingaarutilimmik ineriartorfiulerpoq. Suliap ingerlateqqinnissaani avatangiisinik illersuinissamik, piujuartitsisussamillu ineriartortitsinissamik ukkassiinnarnissarput pingaaruteqarpoq. Kalaallit Nunaanni pinngortitatigut pingaartitat kinguaariit tulliinut pigiinnarsinnaaniassagatsigit, aningaasatigut ineriartortitsinerup piujuartitsinissamut, avatangiisinillu eqqarsaatiginninnermut oqimaaqatigiississallugit akisussaaffigaarput.”

ASN aamma IPISN suuppat?
Pilersaarutip naatsorsuutigisamik avatangiisinut, pinngortitamut, silap pissusianullu sunniutissaanik (avatangiisinut sunniutissaanik), avatangiisinullu sunniutissat killilersimaarneqarnissaannut ingerlatseqatigiiffiup pilersaarutaannik (aaqqiinissaannik) allaaserinninnissaq kiisalu pilersaarutissatut siunnersuutigineqartumut akuersissutissanut piumasaqaatissanik aalajangersaanissamut oqartussat paasissutissanik pisariaqartunik tamanik tunineqarnissaat, avatangiisinut sunniutigisinnaasaanik nalilersuinermi (ASN) ilaatigut siunertaavoq.

Inuiaqatigiinni piujuartussamik iluaqutaasumik sunniutissanik naliliinermi (IPISN), pilersaarutissatut siunnersuutigineqartumut akuersissutissanut piumasaqaatissanik aalajangersaanissamut oqartussat paasissutissanik pisariaqartunik tamanik tunineqarnissaat siunertaralugu, inuiaqatigiinni pissutsinut piusunut pilersaarutip sunniutissaa nalilissallugu ilaatigut siunertaavoq. Namminersorlutik Oqartussat, Kommune Kujalliup aamma Nalunaq A/S-ip akornanni suleqatigiinnissamik isumaqatigiissutissap isumaqatiginninniutigineqarnissaanut IPISN-ip tunngavissiinissaa aamma siunertaavoq.

Ingerlatseqatigiiffik piiaaffimmik aallartisitsigani ASN aamma IPISN Naalakkersuisunit akuersiteqqaassavai. Naliliinerit taakku malitsigisaanik akuersissutissanut sinaakkutissiissapput.

Tamanut tusarniaaneq
ASN-imut aamma IPISN-imut allaqqitassiat, Nalunaq A/S-ip 2023-mi decembarimi Naalakkersuisunut nassiuppaat. Allaqqitassiat taakku 2024-mi januaarip tallimaanit, marsip aallaqqaataata tungaanut tamanut tusarniutigineqarput.

Tusarniaanermi, januaarip 29-anit februaarip aallaqaataata tungaanut, tusarniaanermut atatillugu Kujataani tamanut ammasumik ataatsimiisitsisoqarpoq. Tusarniaanermi ataatsimiinnerni ilaatigut tulliuttut peqataapput:

• Nalunaq A/S-imit sinniisut
• Borgmesteri Stine Egede
• Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen
• Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund

Tusarniaanermi ataatsimiinnerit, tusarniaanermilu akissutigineqartut tunuliaqutaralugit, ingerlatseqatigiiffiup ASN aamma IPISN nutarterpaat. Taassuma saniatigut tusarniaanermi akissutigineqartut katersorlugit, tusarniaanermilu apeqqutigineqartut oqaaseqarfigineqartullu akissuteqarfigalugit tusarniaanermit nalunaarusiat suliarineqarput.

Tusarniaanerup naaneraniilli atortussanik nutartikkanik Nalunaq A/S ataavartumik nassitsisarpoq. Atortussat inaarutaasut ingerlatseqatigiiffiup 2024-mi juunimi Naalakkersuisunut nassiuppai.

Tullertut pisussaq
Ingerlatseqatigiiffik piiaalersinnaatinnani ingerlatseqatigiiffiup piiaanissamut pilersaarutissani, matusinissamullu pilersaarutissani Naalakkersuisunit akuersiteqqaartussaavai. Pilersaarutit taakku inissippata, ingerlatseqatigiiffiup ingerlatassat tamaasa immikkut qinnuteqaatigisinnaassavai, ass.

Sumiiffimmi akuersissuteqarfiusumi ingerlatsisoqalereersoq najukkami innuttaasut takusinnaassavaat. Qanga pilersaarutaareersoq aallartinniarneqarmat tammaarsimaffissami atugassarititaasut, qaartartuusivissaq il.il. pilersinneqareerput. Taamaakkaluartoq ingerlatassat taakku akuersissutaagallaannartumik akuersissuteqarput. Aatsaat piiaanissamut pilersaarut akuersissutigisaq pigineqalerpat, ataavartumik akuersissutit pigineqarsinnaalissapput, ingerlatassallu siammasinnerulersinnaassallutik.

Piiaasinnaanermut akuersissut naapertorlugu, Nalunami kultisiorneq kingusinnerpaamik 2026-mi januaarip aallaqqaataani aallartinneqaqqissimassaaq.

Inuiaqatigiinni piujuartitsinissamik isumaqatigiissutissaq pillugu susassaqartut pingasut akornanni isumaqatiginninniarnerit, 2024-p ukiassariartulernerani/ukiaani aallartinneqassapput. Inuiaqatigiinni piujuartitsinissamik isumaqatigiissutissaq (aamma IBA-mik taaneqartartoq) ingerlatseqatigiiffiup, Kommuni Kujalliup aamma Namminersorlutik Oqartussat akornanni isumaqatigiissutigineqassaaq. IBA-mik isumaqatiginninniarnerit IPISN-imik, tamanullu ammasumik tusarniaanermut atatillugu IPISN-imut tusarniaanermi akissutigineqartunik aallaaveqarput.

Piiaasinnaanermut akuersissut naapertorlugu, isumaqatigiissutissaq kingusinnerpaamik 2024-mi decembarip 31-ani inissereersimassaaq.

Tusarniaavimmi annerusumik paasisaqarit
ASN aamma IPISN akuersissutigineqartut, taakkununngalu tusarniaanermit nalunaarusiat atasut siunissami qaninnerusumi Naalakkersuisut nittartagaanni tamanut saqqummiunneqassapput. Allaatigisat tusarniaanermut ilaasut, tusarniaanermi akissutigineqartut, tusarniaanermullu atatillugu ataatsimiisitsinernit imaqarniliat tusarniaavimmi atuarsinnaavatit.

Attavissat
Tusagassiuut pillugu saaffiginnissutit: Naalakkersuisoqarfimmi pisortaq, Jørgen T. Hammeken-Holm oqarasuaat 346800 imaluunniit Naalakkersuisumut allatsi Manasse Berthelsen oqarasuaat 548868.

Saaffiginnissutit allat: Aatsitassanut Aqutsisoqarfik, mlsa@nanoq.gl