AtuartigukUmiammakku Nunaanni aamma Kangerluarsummi qaqqat tassaarsuartitsisumik sisoorsinnaaneranut aarlerinassusaannut naliliinerit nutaat saqqummiunneqarput
Nassiussisuuvoq:
Qaqqat sisoorsinnaanerannut navianaatit pillugit Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup ilisimasanik nutaanik maanna pigisaqalerpoq. Taakkua Umiammakku Nunaanni aamma Kangerluarsummi ukiuni marlunngortuni misissuisimanernit alapernaarsuisimanermillu tunngaveqarput. Paasissutissat katersorneqarsimasut qaqqat sisoorsinnaanerinik pisinnaasutut takorluukkat malunnaalimmik pitsanngoriartinnissaat pisinnaatilersimavaat.
Tassaarsuaqarsinnaaneranut suli aarlerinartoqartoq
Paasissutissat nutaat takutippaat Uummannap Sulluani qaqqat sisoorsinnaanerannut malitsigisaanillu tassaarsuaqarsinnaanera suli aarlerinaateqarmat, mallilli qarsutsinerisa portussusaannut missigersuutit siornagut naliliinernut sanilliullugit ataatsimut isigalugu malunnaatilimmik annikinnerupput.
Innaq sisuulersinnaasoq paasineqartoq
2017-imi qaqqap sisoortup kangimut saniani qaqqap ilaa siusinnerusukkut immikkut nassuiaatigineqarsimanngitsoq nassaarineqarpoq. Qaqqap ilaa taanna t”2017 kangilleq”-mik taaneqarpoq, taannalu navianaatitut annertut maanna nalilerneqarpoq. Taamaammallu ukiuni tulliuttuni misissoqqinneqassaaq alapernaarsuutillu “2017 kangilleq”- mut tulluussarlugit piorsaavigeqqinneqassallutik.
Suliat ingerlaqqinnissaat
Naalakkersuisoqarfiup pileraarutigaa ornigulluni misissuititsinerit 2024-imi aasanerani ingerlanneqassasut, paasisallu pissarsiarineqartut nutaat navianassutsinik nalilersuinerit pitsanngorsarnerinut atorneqassapput. Alapernaarsueriaatsip maanna atorneqartup qaqqat annertuumik sisoornissaannut ilisarnaatitut ersiutaasut siusissukkut malugisinnaavai. Taamaammallu qaqqap annertuumik sisuulerneranut ersiutit malugineqarpata innuttaasunik qimarngussuineq pisinnaavoq. Alapernaarsuutilli atorneqartut kalerrisaarutitut atorsinnaanngillat, kalerrisaarutimmi qaqqap sisuulernerpiaani najugaqarfiit qanittumiittut innuttaasuinut kalerrisaarisinnaasariaqarmata. Ornigulluni misissuinerit ukkatarisassaasa ilagaat qaqqani pineqartuni kallerisaarutinik ineriartortitsinissamut periarfissat misissornissaat. Suliassasallu ilagissavaat nunap immikkoortuani pineqartumi qaqqanik sisoorsinnaasunik allanik qinaasinissaq. Suliaq taanna ukiut tulliuttut ingerlaneranni nunap sinneranut siammarlugu naginneqassaaq.
Nalunaarusiaq Naalakkersuisunut, Kalaallit Nunaanni Upalungaarsimaniarnermut Ataatsimiititaliarsuarmut kiisalu Avannaata Kommuniata kommunalbestyrelsianut saqqummiunneqarnikuuvoq.
Apeqqutit Upalungaarsimaniarnermut Ataatsimiititaliarsuup navianassutsinik naliliineranut tunngassuteqartut Nunalerinermut, Imminut Pilersornermut, Nukissiuuteqarnermut Avatangiisinullu Naalakkersusoqarfimmit akineqassapput, pan@nanoq.gl.
Paasissutissat ujarassiornikkut nalilersuinernut tunngassuteqartut sukumiinerusut pillugit naalakkersuisoqarfiup pisortaa Jørgen T. Hammeken-Holm (joeh@nanoq.gl) saffigineqarsinnaavoq.