Nunatsinni ilisimatusarneq pillugu oqaloqatigiinnissaq

Naalagaaffinngornissamut Nunanullu Allanut Naalakkersuisoq Vivian Motzfeldt Nunatsinni ilisimatusarfinnik, ilisimatusartunik ilisimatusarnermillu soqutigisaqartunik ilisimatusarnermut inatsisiliornissaq pillugu sisamanngorneq ulloq 20. juni 2024 oqaloqatigiinnissamut qaaqqusivoq. Oqaloqatigiinnerit marluusut siullersarissavaat, taakkunani tulliuttoq ukiap ingerlanerani pissalluni.

Kalaallit Nunaanni ilisimatusarnermut periusissiami 2022-2030-mi nunatsinni ilisimatusarnermi inatsisikkut sukannernerusunik sinaakkutissiisoqassasoq, tamannalu nunatsinni nunami tamarmik ilisimatusarnermut periusissiami 2022-2030-mi anguniakkatigut sisamaasutigut pissasoq siunnersuutigineqarpoq:

1. Ilisimatusarneq nunatsinnit aallaaveqassaaq

2. Ilisimatusarnerup inuiaqatigiit nappanneqarsinnaasumik ineriartortitsineq tapersissavaa

3. Ilisimatusarnermi paasisat tamanit ajornanngitsumik pissarsiarineqarsinnaassapput

4. Ilisimatusarneq nunat tamat akornanni ilisimatusarnertut qaffasissuseqassaaq

Aallaaveqarneq isumaqarpoq ilisimatusarneq nunatsinnit aallaaveqassasoq nunatsinnilu inuiaqatigiinnut qanimut tunngassalluni. Nunanit allanit ilisimatusar¬nissamik soqutiginnikkiartortoqarpoq ilisimatusartorpassuillu nunatsinni ukiut tamaasa ilisimatusartarput. Tassunga ilanngullugit ilisimatusarfiit uuttuutinik atortulersuutinillu allanik ikkussuisarput. Tamassuma saniatigut ilisimatusarneq pillugu inatsimmik amigaateqartoqarpoq aammalu nunatsinni sumiiffini amerlasuuni ilisimatusarnerit ataqatigiissarneqarnissannik aamma pisariaqartitsisoqarluni.

Kalaallit Nunaanni ilisimatusarneq pillugu sinaakkutaasumik maannakkut inatsise-qanngilaq, ilisimatusarnissarlu pillugu qinnuteqaatinut inatsisitigut malittarisassat killeqarput. Oqaloqatigiinnermi siullermi sumiiffinni allani qanoq iliortoqartoqartarnera aamma paasiniarneqassaaq, taakkunani ajornartorsiutit, ineriartortitsinissamut suut periarfissaanersut ilisimatusarnerlu pillugu inatsisini atuuttuni suut pitsannguutaasinnaanersut paasiniarneqassalluni.

Naalagaaffinngornissamut Nunanullu Allanut Naalakkersuisup Vivian Motzfeldtip ilisimatusarfiit, ilisimatusartut aamma nunatsinni ilisimatusarnermik soqutigisaqartut tamaasa qaaqquneqartut oqariartuutaasa tusarnissaat qilannaaraa neriuutigalugulu ammasumik assigiinngisitaartumillu oqallittoqassasoq.

Vivian Motzfeldt:
”Nunatsinni kalaallit ilisimatusarnikkut inissisimanerisa pitsanngorsarnissaat aamma ilisimatusarnerup nunatsinnut iluaqutaanerulernissaa oqaluuserissavarput.”

Kalaallit Nunaanni nuna tamakkerlugu ilisimatusarnermut periusissiamut 2022-2030 iserfissaq

Paasissutissat annertunerusut pillugu saaffigisassaq: Ineqi Kielsen, naalakkersuisup allattaagallartoq, e-mailikkut inek@nanoq.gl oqaraasuaatikkulluunniit +299 345149