Kalaallit Nunaata Parisimi isumaqatigiissummut ilaalerneranut atatillugu Kalistat Lundip Simon Stiell aamma Dan Jørgensen tikilluaqquai

Ullumikkut Nunalerinermut, Imminut Pilersornermut, Nukissiutinut Avatangiisinullu Naalakkersuisup Kalistat Lundip FN-ip silap pissusianut allattoqarfiani (UNFCCC) Executive Secretary Simon Stiell aamma ineriartortitsinermi suleqatigiinnermut nunarsuarmilu silap pissusia pillugu politikkimut ministeri Dan Jørgensen Kalaallit Nunaannut tikilluaqquai. Tikeraarnerini sisamanngornermi 20. juunimi persuarsiorfiusumik atsioqatigiittoqassaaq, tassanilu Naalakkersuisup Kalaallit Nunaat Parisimi isumaqatigiissummut ilaalersoq UNFCCC-mut nalunaarutigissavaa.

Naalakkersuisoq Kalistat Lund ullumi makkunani (19. – 21. juni 2024) UNFCCC-mut Executive Secretary-mik Simon Stiell-imik aamma ineriartortitsinermi suleqatigiinnermut nunarsuarmilu silap pissusia pillugu politikkimut ministerimik Dan Jørgensen-imik tikeraartoqarpoq. Tikeraarnerannut Kalistat Lund-ip – Naalakkersuisut sinnerlugit, aammalu Inatsisartunit piginnaatitsissut tunngavigalugu – 20. juuni 2024-mi Simon Stiell-imut aamma UNFCC-mut Kalaallit Nunaata Parisimi isumaqatigiissummut ilaalernera pillugu nalunaaruteqartussaanera peqqutaavoq. Tamatumunnga atatillugu Kalistat Lundip aamma Dan Jørgensenip nunani tamalaani silap pissusia pillugu isumaqatiginninniarnerni Naalakkersuisut aamma danskit naalakkersuisuisa akornanni suleqatigiinnissamut isumaqatigiissutaat nutartigaq atsiussavaat.

”Naalakkersuisut aamma danskit naalakkersuisuisa akornanni suleqatigiinnissamut isumaqatigiissut nutartigaq piviusunut nutaanut, Kalaallit Nunaata Danmarkillu marluullutik Parisimi ilaalerfigisaannut naapertuuppoq. Suleqatigiinnissamut isumaqatigiissummi Kalaallit Nunaata aamma Danmarkip akornanni naligiinnermut ataqqeqatigiinnermullu tunngavissat tunngavigineqarput. Maanna – Naalakkersuisut sinnerlugit – suleqatigiinnissamut isumaqatigiissutip nutarterneratigut Kalaallit Nunaata Parisimi isumaqatigiissummut ilaalernera pillugu nalunaaruteqarnissamut Inatsisartut aalajangiinerat piviusunngortissinnaagakku tulluusimaarutigaara”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

”Kalaallit Nunaata maanna Parisimi isumaqatigiissummut ilaalernera, taamaalillutalu ataatsimoorluta silap pissusiata allannguutaanut suliniutinik annertusititsisinnaalernerput nutaarsiassaavoq nuannerluinnartoq. Parisimi isumaqatigiissummi ataatsimoorsinnaalernerput alloriarneq annertuujuvoq, Kalaallit Nunaannuinnaanngitsoq, aammali Kunngeqarfimmut”, ineriartortitsinermi suleqatigiinnermut nunarsuarmilu silap pissusia pillugu politikkimut ministeri Dan Jørgensen oqarpoq.

Hans Egedep Illuani persuarsiorfiusumik atsioqatigiinneq tusagassiortunillu katersortitsineq
Suleqatigiinnissamut isumaqatigiissutip nutartikkap atsiorneqarnissaanut – tamatumalu kingorna Parisimi isumaqatigiissummut ilaalernermut – atatillugu 20. juuni 2024-mi nal. 10:00 Hans Egedep Illuani persuarsiorfiusumik atsioqatigiittoqassaaq.

Persuarsiorfiusumik atsioqatigiinnermut ilassutigalugu tusagassiortunik katersortitsisoqassaaq, tassanilu tusagassiortut najuuttut suleqatigiinnissamut isumaqatigiissut aamma Kalaallit Nunaata Parisimi isumaqatigiissummut ilaalernera pillugu apeqquteqarnissamut periarfissaqassapput.

Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqarsinnaavoq.