Tasiilami innuttaasut peqqissuseq sammivaat

Peqqissutsimut Naalakkersuisoq Agathe Fontain ulluni 12.- 15. juni 2024-mi Tasiilamut tikeraarpoq.

Illoqarfiup katersortarfiani sisamanngornermi unnukkut innuttaasunik ataatsimiititsisoqarpoq. Innuttaasut aamma illoqarfimmi peqqissuseq pillugit qanimut oqaloqatiginninnissaq, kiisalu Peqqissutsimut tunngatillugu isumaqatigiissutip partiinit amerlanerussutigineqartunit isumaqatigiissutigineqartup imarisaanik aamma peqqinnissaqarfimmut tunngatillugu nukittorsaanermik suliaqarnermi politikkikkut tunngaviusumik paasititsinissaq innuttaasunik ataatsimiititsinerup siunertaraa.

Agathe Fontain oqarpoq:
Innuttaasunik ataatsimiititsinermut takkuttut amerlalaavipput. Najukkami peqqissuseq aamma pinaveersaartitsinermik suliassaqarfiit sammineqarnerat ersarippoq. Peqqinnissaqarfimmut attaveqarneq aamma katsorsaanermut neqeroorutit, napparsimasunut ilaqutaasut ingiallortaasarnerat, innuttaasut puigortunngortut aamma tarnimikkut napparsimasut atugaat, kiisalu hashimik atornerluisunngortarnermut pinaveersaartitsineq oqaluuserineqartut ilagaat.

Nangipporlu...
Pingaartumik peqqissaavimmi kigutileriffimmilu sulisut tupigusuutigaakka. Taakku pisuni immikkut ittumik iliuuseqarfiusariaqartunik nalaataqakkajuttarput, pitsaasumik iliuuseqarlutik aamma qaffasissumik suliamut ilisimasaqarlutik suliarinnittarput.

Agathe Fontain aammattaaq ukununnga pulaarpoq: utoqqaat illuat, najugaqarfik Aappaluttoq aamma najugaqatigiiffik Qorsuk.

Paasisaqarnerorusukkuit naalakkersuisup allattaa Birgithe Heinrich e-mailikkut: bihe@nanoq.gl imaluunniit oqarasuaatikkut ugguuna attaveqarfigineqarsinnaavoq: +299 34 66 17.