AtuartigukNaqqiissut: Inuit innarluutillit pillugit inatsisissatut siunnersuummik isornartorsiuinermi kukkussuteqarneq eqqunngitsunillu oqaaseqarneq
Nassiussisuuvoq: Meeqqanut Inuusuttunullu Naalakkersuisoqarfik
Inuit innarluutillit tapersersorneqarnissaat pillugu Inatsisartut inatsisissaattut siunnersuut inunnik innarluutilinnik amerlanerusunik pisussaaffeqalersitsissaaq Inuillu Innarluutillit pisinnaatitaaffii pillugit Naalagaaffiit Peqatigiit isumaqatigiissutaanik Kalaallit Nunaata malinninnissaanut pitsanngorsaassaaq.
Ullumi nittartakkatigut aviisi Sermitsiaq.ag saqqummiussivoq qulequtserlugu “Tilioq aamma NIIK siunnersuummut sakkortuumik akerlilersuipput”. Saqqummiussami oqaatsit eqqunngitsut kukkussutillu arlaqartut saqqummiunneqarput.
”Ajuusaarnarpoq inuit innarluutillit pisinnaatitaaffiinik amerlanerusunik imalik inatsisissatut siunnersuut annertooq eqqunngitsunik, kukkusunik oqaasertalersorneqarnera tigulluarneqannginneralu. Inatsisissatut siunnersuusiortilluta angusaqarluarniartarpugut, taamaalilluta innuttaasunut innarluutilinnut sinaakkutinik sapinngisamik pitsaanerpaanik qulakkeerinnittarluta” Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqarpoq.
Inuit innarluutillit ilaqutaannit qanimullu avatangiiserisaannit nuutsinneqarsinnaanerannut inatsisitigut tunngavissaq pillugu oqaasertaliineq eqqortuunngilaq.
“Inunnut Innarluutilinnut Inuttut Ikiorsiissutinik (BPA), Siusissukkut iliuuseqarnermik aamma assersuutigalugu angerlarsimalluni sungiusarnikkut assingusunilluunniit aaqqiissuteqarnikkut piginnaanngorsaanermut piginnaanngorsaaqqinnermullu periarfissanik annertunerusunik, kiisalu sulisinnaanermut aqqutissiuinernut periarfissanik” ilanngussaqannginnikkut ajorseriartitsinernik oqaasertaliinerit eqqortuunngillat.
Oqaasertaliineq “...namminersorlutik oqartussat kommunillu sapinngisamik piumasaqaatit malillugit innarluutillit sullissinissaat pinngitsoortinniarsarigaat...” eqqortuunngilaq.
Eqqortoq tassaavoq inuit innarluutillit tapersersorneqarnissaannut Inatsisartut Inatsisissaatut siunnersuut ilaatigut siusissukkut iliuuseqartarnerit pillugit aalajangersakkanik nutaanik aamma angerlarsimalluni sungiusarnissamik periarfissanik mattussinertaqanngitsumik piginnaanngorsaanerit piginnaanngorsaaqqinnerillu pillugit aalajangersakkanik amerlanerusunik imaqartoq.
Pisinnaatitaaffiit nutaat ilaatigut ilaqarput: Innarluutillip imaluunniit sakkortuumik nappaatillip qanigisaata paarisarnissaa, Malitseqartitsineq, Inersimasunut innarluutilinnut tamanut, angerlarsimaffiup avataani najugaqarfissatut neqeroorummiittunut ukiumut ataasiartumik angerlarsimaffimmut tikeraarsinnaatitaaneq, allallu. Pisinnaatitaaffiit nutaat tamaasa inunnut innarluutilinnut pitsanngoriaataapput annertuut, Naalakkersuisoq erseqqissaavoq:
”Inunnut innarluutilinnut atugassarititaasut pitsanngorsaavigineri ingerlatiinnassavagut – inatsisitigut suleriusitigullu. Amerlasoorpassuarnik unammilligassaqarpugut, pingaartumik suliatigut isumalluutinik amigaateqarnernik tunngasunik. Inunnut innarluutilinnut tunngassuteqartuni suliamik ilisimasalinnik amerlanerusunik aamma inunnut innarluutilinnut tunngassuteqartuni sulisunik piginnaasatigut qaffassaanissanik pisariaqartitsivugut”.
”Politikikkut anguniagarput tassaavoq inuiaqatigiinni ineriartornerup tapersersuiffiginissaa, tassani meeqqat, inuusuttut inersimasullu innarluutillit inuiaqatigiinni innuttaasut allat assigalugit namminneq piukkunnaatiminnik atorluaanissaminnut periarfissat assingannik atuisinnaassallutik,” Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqarpoq.
Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.