Tusagassiortut ingerlatsinermilu teknikerit pillugit isumaqatigiissut nutaaq isumaqatigiissutigineqarpoq

Tusagassiortut ingerlatsinermilu teknikerit Namminersorlutik Oqartussani kommuninilu, tassunga ilanngullugu KNR-imi atorfeqartut isumaqatigiissutissaata nutaap ukiuni sisamani atuuttussap imarisassai Dansk Journalistforbundip (DJ) Tusagassiuiernermilu Sulisut Peqatigiiffiata (TP) aamma Aningaasaqarnermut Sulisoqarnermullu Aqutsisoqarfiup akornanni isumaqatigiissutigineqarput.

Illuatungeriinnit qitiutinneqarsimapput akissarsiat pisissutaasinnaasut pitsaanerulersinneqarnerat, soraarnerussutisiassat pitsaanerulersinneqarnerat, erninermut atatillugu sulinngiffeqarnermi tamakkiisumik aningaasarsiaqartinneqalernerat kiisalu ilinniaqqinnissamut ilinniagaqaqqinnissamullu periarfissaasa pitsaanerulersinneqarnerat aqqutigalugit akissarsiatigut atugassarititaasut isumaqatigiissutillu tunngavigalugit atorfeqarnermi atugassarititaasut pitsaanerulersinneqarnissaat. Taakkua saniatigut tapisiaqartitaasarnerit aaqqissugaanerat pisariinnerulersinneqarput kiisalu isumaqatiginninniartarnermut isumalioqatigiissitap inassuteqaatai naapertorlugit isumaqatigiissut paasiuminarnerulersinneqarluni.

Isumaqatiginninniartut tamarmiullutik isumaqatiginninniarnerup sakkortuumik ingerlanneqarnera angusarineqartullu naammagisimaarnerarpaat.

Isumaqatiginninniarnermi angusat TP-p ilaasortaasa akornanni maanna taasissutigineqassapput, tamatumalu kingorna isumaqatigiissutip atuutsinneqalinnginnerani Naalakkersuisunit akuersissutigineqassallutik. Tamatuma kingorna isumaqatigiissutip oqaasertassai isumaqatiginninniartunit naammassillugit suliarineqassasut naatsorsuutigineqarpoq. Isumaqatigiissut ulloq 1. april 2024-miit atuutilissaaq, ullorlu taanna aallarnerfigalugu akissarsiat kingumoortumik iluarsiiffigineqassallutik.

Apeqqutissaqartoqarpat Aningaasaqarnermut Sulisoqarnermullu Aqutsisoqarfimmi Sulisoqarnermut aamma Isumaqatiginninniarnermi pisortaq Frederik Schmidt, fsch@nanoq.gl aqqutigalugu, saaffigineqarsinnaavoq.