Nakkutilliisoqarfimmiit tusagassiortunut nalunaarut

Aningaasaqarnermut Naligiisitaanermullu Naalakkersuisoqarfiup Nakkutilliioqarfimmut, kommunalbestyrelsemut ilaasortamut, imaluunniit ilaasortanut arlalinnut kommunit missingersuutinut naatsorsuutinullu inatsimmi §47, imm. 2 aamma 3 naapertorlugu, ilaasortatut pisussaatitaaffimmik sumiginnaasimasoqarsimanersoq, taamaammallu suliamik aallartitsisoqassanersoq isummerfigineqartussatut suliakkiussaa pillugu ulloq 24. Maj 2024 Nakkutilliisoqarfik ataatsimiippoq.
Nakkutilliisoqarfik ima aalajangerpoq:

1. Kommuneqarfik Sermersuup piffissami 2018-2022-mi, Naalakkersuisuniit akuersissummik pissarseqqaarnani, tamaattumillu missingersuutinut naatsorsuinermullu inatsimmi § 24, imm. 1, nr. 3-mi malittarisassanut akerliusumik, attartornermut attartortitsinermullu 31-nik isumaqatigiissusiornera pillugu Nakkutilliisoqarfiup assuaraa.
2. Nakkutilliisoqarfiup Kommuneqarfik Sermersuumi kommunalbestyrelsimut ilaasortaq ataaseq arlallilluunniit, missingersuutinut natsorsuutinullu inatsimmi § 47 kiisalu aqunneqarneqarnermut inatsimmi § 63 naapertorlugit, pisussaaffimminnik sakkortuumik unioqqutitsisutut unnerluussisussaatitaasunut unnerluutigineqarnissaat naammattumik tunngavissaqarsorinngilaa.

Tunngavilersuineq:
Aningaasaqarnermut Naligiissitaanermullu Naalakkersuisoqarfiup kommuni missingersuutinut naatsorsuutinullu inatsimmi § 24, imm. 1-imik unioqqutitsisutut sakkortuumik assuarlerpaa. Naalakkersuisoqarfik isumaqarpoq, kommuni immikkut ittumik assuarlernartumik pissusilersortoq, taamaattumillu assingusumik pisoqaqqinnginnissaa kommunip qulakkeertariaqaraa erseqqissaatigalugu. Suliaq Nakkutilliisoqarfimmut tunniunneqarpoq, missingersuutinut naatsorsuutinullu inatsimmi § 47 naapertorlugu kommunalbestyrelsimut ilaasortaq ataaseq arlallilluunniit ilaasortatut pisussaaffimminnik sakkortuumik unioqqutitsisoqarnersoq pillugu suliassanngortitsinissamut tunngavissaqarnersoq naliliiffigeqqullugu.

Nakkutilliisoqarfiup borgmesteri imaluunniit Aningaasaqarnermut Ataatsimiititaliami ilaasortat allat nakkutilliinissamut pisussaaffimminnik ima unioqqutitsinerat sakkortutigisoq allaat, aqunneqarnermut inatsimmi § 63 malillugu akiliisitsisoqassaneranut isummerfigeqqusaq, tunngavissaqanngitsoq naliliiffigaa.

Kommuneqarfik Sermersuup nassuiaammini ilisimatitsissutigaa, attartornermut attartortitsinermullunniit isumaqatigiissutit arlaannaalluunniit politikkikkut suliassanngorlugit saqqummiunneqanngitsut, taamaalillunilu kommunip ingerlatsinera kisimi isumaqatigiissusiortuusoq. Ilanngullugu kommunalbestyrelsimut ilaasortat ataasiakkaat kommunip suleriaasianut ilisimasaqarnersut, imaluunniit ilaasortat aarlerissuteqarnernik assigisaanilluunniit tigusaqarnersut, ilaasortat kommunip suleriaasia pillugu sukumiinerusumik misissuisoqarnissaanut piumasaqalersitsisinnaasut pillugit aamma paasissutissaqanngilaq.

Nakkutilliisoqarfiup maluginiarpaa, Kommuneqarfik Sermersuup ilisimatitsissutigigaa, Aningaasaqarnermut Naligiissitaanermullu Naalakkersuisoqarfimmiit 2. december 2022-mi saaffiginnissuteqarnerata kingorna kommuni suleriaatsimik aallartitsisoq, taamaalilluni kommunimi immikkoortortaqarfiup attartornissamut attartortitsinissamullu isumaqatigiissusiornissaq sioqqullugu suliassat suliarineqartarnerat pisariaqartoq qulakkeerinnittussaq.

Nakkutilliisoqarfiup ataatsimiinnerani tulliuttut peqataapput:

Sólja Ì Ólavsstovu, Nakkutilliisoqarfimmi  siulittaasoq.

Marianne Jensen, Inatsisartunit toqqarneqartoq.

Evelyn Mølgaard, kommuninit toqqarneqartoq.

Sinniisoq Klaus Lundblad, kommuninit toqqarneqartoq.

Kommunit aqunneqarnerat pillugu Inatsisartut inatsisaanni nr. 29, 17. november 2017-imeersumi § 52, imm. 3 naapertorlugu suliamut attuumassuteqarneq pissutigalugu Juaaka Lyberth aamma
Doris J. Jensen aalajangeeqataasinnaanngillat.

Annertunerusumik paasisaqarusukkuit saaffiginnissinnaavutit uunga immikkoortortaqarfimmut pisortaq Brandur F. Karlsson brka@nanoq.gl