AtuartigukSaviminilerinermut ilinniarfittaassaq Sisimiuni sananeqassaaq
Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Saviminilerinermut Ilinniarfimmik nutaamik sanasoqarnissaa pillugu Naalakkersuisut tunngaviusumik aalajangiipput. Sanaartugassaq nutaaq taanna Sisimiuni KTI-p ilaatut inissinneqassaaq, taamaaliornermi ilinniartitaanermi sullissivittut annertunerusumik qaffassarneqassalluni.
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisup Aqqaluaq B. Egedep, sanaartugassaq qilanaaraa.
”Ilinniarfissap Sisimiuni, inuussutissarsiutinut ilinniartitaanernik ingerlatsivioreersumi, inissinneqarnerani, ilinniartunut, atuartitsisussanut inuiaqatigiinnullu eqqaaniittunut iluanaarutissat arlallit annertuut pissarsiarineqarsinnaassapput”, oqarpoq Aqqaluaq B. Egede nangillunilu:
”Sisimiut ingerlalluareersunik avatangiisilinnik ilinniarfeqareerpoq. Tamanna Saviminilerinermut Ilinniarfiup nutaap pilersinneqarnerani nukittorsarneqaqqittussaavoq. Ilinniartitaanerni suliassaqarfiit akimorlugit suleqatigiinneq siuarsarneqassaaq. Ilinniartut ilinniagaqarfiit akimorlugit ilisimasaminnik misilittakkaminnillu avitseqatigiissinnaapput, aammalu atuartitsisut atuartitsinermi periaatsinik atortussanillu ineriartortitsineq suleqatigiissutigisinnaavaat”, oqarpoq Aqqaluaq B. Egede.
Alloriarnissaq tulleq tassaassaaq sanaartugassamut pilersaarusiornissap neqeroortitsivigineqarnera. Suliassat ukiuni arlalinni sivisussuseqassasoq naatsorsuutigineqarpoq aammalu Saviminilerinermut Ilinniarfissaq 2030-mi naammassissasoq naatsorsuutigineqarluni.
Annertunerusunik oqaaseqaateqarnissamut attaveqarfigineqassaaq Naalakkersuisup allattaa Rosa Thorsen, oqarasuaat: 345702, mail: rose@nanoq.gl