20. maj nunami namminermi naligiissitaanermut ullua iluatsillugu Naaja H. Nathanielsenip aamma Aqqaluaq B. Egedep oqaaseqaataat:

Naligiissitaaneq arnat suliassarinngilaat, kisianni inuiaqatigiit susassaqarfigaat. Aammalu nunami namminermi naligiissitaanerup ullua, naligiissitsinnginnerup nukappiaqqanut angutinullu eqquisartup sammineqarnissaanut, piffissaalluarpoq.

Pingaartumik suliassaqarfiit pingasut tamatta aarlerissuteqalersittariaqaraluarpaatigut:

1) Angutit nukappiaqqallu ileqqunit aammalu angutit allanngortikkuminaatsumik nuannaartorineqarnerannik killilerneqarput.
2) Angutit nukappiaqqallu kiserliornermik, angerlarsimaffeqannginnermik atornerluinermillu aammalu imminut toquttarnermut tunngatillugu ajornartorsiornerusarput.
3) Angutit nukappiaqqallu ilinniartitaanerni ingerlaqqiffiusuni ikinnerujussuupput.

Taakkua tamaasa ataatsimoortillugit kingunerisaannik anguterpassuit nukappiararpassuillu periarfissanik tamakkiisut atunngitsoortarpaat aammalu inuunerminnut imaluunniit inuiaqatigiinni ilaaffigisaminni sunniuteqanngitsoortarlutik. Tamanna angutit inissisimaffinni sunniuteqarluarfiusartuni amerlanerussuteqarnerannit aammalu angutit arnaniit isertitaqarnerujussuusarnerannit allaanerulluinnarpoq. Taamaattumik angutit takorluukkatik anguniagaqarfigisatillu iluatsinngikkaagamik, imminnut iluatsinngitsoornerusutut misigilersinnaasarput, pissutigalugu angutit nuannaartorineqarneranniimmat nukittuujussasut qullersaassasullu.

Angutit timimikkut nukittuujullutik nuannaartorineqarnerisa nersorniarneqartarnerat, sunnertiassusaa tapersersorneqarnissamillu pisariaqartitsinerat nakkarsaatigineqartarluni, annertoorujussuarnik sunniuteqartarpoq. Angutit nukappiaqqallu kamannerat saassussiniartarnerallu akuersaarneqartarpoq aammalu misigissutsinik takutitsinertut ajunngitsutut akuerineqartarluni, ernumassuteqarneq, nalornissuteqarneq qullilinerlu kanngunartutut isigineqartarlutik. Tamanna allanngortittariaqarparput.

Angutit nuannaartorineqarnerat nukappiaqqat angutillu pisariaqartitsilernerminni ikiortissarsiunngitsoortarnerannik malitseqarsinnaasarpoq – tassanilu nukappiaqqap imaluunniit angutip tatisimaneqartup persuttaaneq, atornerluineq imaluunniit imminut toqunnissaq aaqqiissutissatut iliuuserisinnaasaraat, immaqa nassuiaatissarsisinnaavarput.

Pitsaanngitsumik ingerlasoqarnerata kipitinnissaanut tamatta akisussaaqataavugut. Tamatta inuiaqatigiinni ileqqussanik inooqatigiinnermilu pissusilersuutigineqartussanik peqatigiilluta pilersitsisarpugut. Ataatsimoorluta suiaassutsini pisartut aammalu aalajangersimasuinnaat isigalugit angutinik nuannaartorinninneq, angutit tapersersortissarsiortarnissaannik tapersorneqarnissaminnillu akuersisarnissaannik kaammattorlugit, ataatsimoorluta atuukkunnaarsittariaqarpagut, aammalu nukappiaqqat angutillu anguterpalunnernit assigiinngitsunik ilusilinnik oqariartuuteqarsinnaanerannut aqqutissiuullugit.

Ilinniartitaanerni suiaassuseq aammalu suiaassutsini ileqqussat ammanerusumik qanoq suliaqarfigisinnaanerivut qulaajarlugit Naalakkersuisuni aallartippugut. Ilinniartitaanerit meeqqanut inuusuttunullu ukkatarinniffiusut, kisianni aamma ilinniartitaanerit suiaassutsini naligiinngiffiunerpaajusut, immikkut isiginiarpagut. Allanngoriartornerit suulluunniit isumassarsinermik nutaaliorusussuseqarnermillu aallartittarput, aammalu ukioq manna kingusinnerusukkut ilinniartitaanermut suliassaqarfimmi eqqarsaatitta saqqummiussinnaanissaannut aammalu immersorneqarnissamut, qilanaarpugut.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl, tlf.: 34 52 06