Innuttaasunik sullissineq qanimullu oqartussaaneq aallaavigalugit kommunit aaqqissuussaanerat pillugu naliliineq

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfik kommunit aaqqissuussaanerannut atatillugu innuttaasut iluarisimaarinninnerat pillugu misissuinissamik suliaqarpoq.

Inatsisartut Naalakkersuisut peqquvaat, sinaakkutit atuuttut innuttaasunik sullissinermut aamma qanimut oqartussaanermut isumaat pillugit innuttaasut misilittagaat misigisaallu aallaavigalugit kommunit aaqqissuussaanerat pillugu nalilersuinermik suliaqassasut.

Paasissutissanik katersineq

Peqataasussanik toqqaaneq makitsinikkut ingerlanneqassaaq, Kalaallit Nunaanni inuit 18-it sinnerlugit ukiullit tamarmik toqqarneqarsinnaallutik. Paasissutissanik katersineq immikkoortunut agguataarneqarpoq, aallaqqaammut innuttaasut misissuinermut peqataaqquneqassallutik e-Boks aqqutigalugu.
Immikkoortup aappaani peqataasut e-Boks aqqutigalugu akissuteqanngitsut, misissuinermut peqataanissaq pillugu SMS-imik tigusaqassapput. Tassani apeqqutinik immersuilluni akisassanut aamma innersuussissut toqqaannartoq aqqutigineqarsinnaavoq taamaalilluni oqarasuaatikkut immersuineq pisinnaalluni.
Immikkoortut pingajuanni misissuinermi toqqarneqartut inuiaqatigiinni amerlanernik sinniisunik peqarnersoq naalakkersuisoqarfiup nalilissavaa. Misissuinermi nunap immikkoortuisa ilaanni ikippallaanik toqqaasoqartoq naliliiffigineqarpat, naalakkersuisoqarfik nunap immikkoortuini taakkunani inunnik oqarasuaatikkut attaveqassaaq.

Paasissutissanik katersineq aallartissaaq sapaatip akunnera 20-mi.

Nunap immikkoortuini inuiaqatigiinni amerlanernik sinniisut
Misissuinermi nunap immikkoortuini amerlanernik sinniisut peqataassapput. Kalaallit Nunaat kommunit aggorneqarnerat tunngavigalugu nunap immikkoortunut tallimanut aggorneqassaaq. Nunap aggornerini tamani pingasunut aggoqqinneqassapput, ilanngunniarlugit 1) kommunimi illoqarfik pingaarnersaq 2) illoqarfiit allat aamma 3) kommunimi nunaqarfiit.

Misissuinermi innuttaasut 4.274-it peqataassapput.

Angusat

Innuttaasut iluarisimaarinninnerannik misissuinermi angusat kommunit aaqqissuussaanerat pillugu naliliinermi ilanngunneqassapput. Naliliineq Inatsisartut ukiakkut ataatsimiinneranni agguaanneqassaaq.

Eqimattat najoqqutassiisut

Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoqarfiup eqimattat najoqqutassiisut kiisalu suliamut siunnersuinerat pingaaruteqartoq pillugu qujassuteqarfigai.

Eqimattat najoqqutassiisut:

- Najaaraq Demant-Poort, Ph.d.-studerende, Ilisimatusarfik
- Birger Poppel, emeritus, Ilisimatusarfik
- Kelton Minor, Postdoctoral Research Scientist, Columbia University
- Jørgen Jeremiassen, illoqarfik pillugu pisortaq, kommunit kattullutik toqqagaat
- Per Lyster Pedersen, siunnersortaaneq, Naatsorsueqqissaartarfik

Siunnersorti:
Niels Jørgen Mau Pedersen, VIVE – Det nationale forsknings- og analysecenter for Velfærd

Annertunerusumik paasisaqarusukkuit attaveqarfigiuk Brandur F. Karlsson, Nunamut Namminermut Immikkoortortaqarfimmi pisortaq, e-mailikkut: brka@nanoq.gl