AtuartigukAalisarneq pillugu inatsisissap oqallisiginissaa
Nassiussisuuvoq: Aalisarnermut Piniarnermullu NaalakkersuisoqarfikAalisarneq pillugu inatsit ullumi sisamanngornermi 11. april Inatsisartuni siullermeerneqassaaq.
Aalisakkanik isumalluutit inuiaqatigiinnit pigineqartut inatsisissatut siunnersuummi pingaartinneqarpoq, taamaattumik piginnittuunermik siammaaneq siunniunneqarpoq. Aalisarneq uumassusilinnik aningaasaqarnikkullu piujuartitsinerussaaq kiisalu inuuniarnikkut attanneqarsinnaasumik ingerlatsinerussalluni. Paasissutissanik katersineq pitsanngortinneqartariaqarpoq, taamaalilluni inuiaqatigiinni pisuussutinik atuinermi ingerlatsineq ammasumik pissuseqarnermik tunngaveqassalluni.
”Maannakkut aalisarnermut inatsisaasoq ukiunik 28-nik pisoqaassuseqarpoq. Piffissap ingerlanerani pissanganartunik oqallinnerpassuaqarsimavoq isummertoqartarlunilu aamma piffissap ingerlanerani amerlasuunik allannguisoqartarsimavoq. Aalisarneq pillugu inatsisissap nutaap suliarinerani inuppassuit peqataatinneqarsimapput. Maanna Inatsisartuni oqallinneq aallartissavarput. Oqallinnissamut qilanaarpunga, neriuutigaaralu pissarsiffiussasoq kinguneqarluarlunilu”, Aalisarnermut Piniarnermullu Naalakkersuisoq, Kim Kielsen oqarpoq.
Aalisarneq pillugu inatsisissaq ulloq 8. maj aappassaaneerneqassaaq pingajussaaneerneqassallunilu ulloq 16. maj.
Aalisarnermut inatsisissatut siunnersuut pillugu allakkiat tamakkerlugit; Inatsisissamik siunnersuut, nassuiaatit, tusarniaanermut allakkiaq aamma tunuliaqutitut allakkiat, Aalisarnermut Piniarnermullu Naalakkersuisoqarfimmi nittartakkami Naalakkersuisut.gl-imi pissarsiarineqarsinnaapput.